最近外國有消息傳出，謂寶馬車廠為抗衡福士Golf及福特Focus等車款，故正落力研製全新1系小車；新車不但擁有既吸引又突出嘅造型之餘，不俗嘅性能表現，亦係新車賣點所在。
從預想圖中可以睇到，全新1系嘅造型，與早前於各大國際性車展中亮相嘅CS-1概念車相近，當中車頭一組頭燈，就最能將呢個特點展露出來；另一方面，新車將備有三門或五門揭背型號供選擇，以迎合不同用家需要。至於車廂布局方面，則與現有嘅3系房車相類似，除乘坐舒適之餘，設備配搭又見齊全，兼且用落重好方便㖭；但由於新車仍屬設計階段，故有待廠方公布有關此車嘅資料後方可作實。該消息又指出，廠方將會為新車提供多個引擎配搭選擇，當中包括有1.8及2.0公升引擎，另外當然唔少得重有高性能版本所採用嘅一台2.4公升引擎（馬力約250匹），以迎合不同用家嘅需要。有興趣嘅車迷，就不妨留意新車嘅推出日期喇。