阿董周街搵問責部長，八方聽聞到目前為止，外面肯制嘅人唔多，連最有機嘅國泰總裁陳南祿，聽講都唔會加入政府。點解會有陳總個名？知情人士話，因佢同阿松有個共通之處，就係身家厚，所以唔嫌部長人工只有三百幾萬。唔講唔知，原來陳南祿太座都係有背景之人，唔怪得唔憂米。
八方噚日聽陳總上港台張笑容個節目，意外咁聽到空氣中火花四濺，陳總不停被挑戰，話國泰稅又交得少過人，票價又貴過人；張笑容重暗示陳總喺太古做咗二十幾年，對公司好忠心，慢吓手佢做咗經濟局局長，國泰就掂晒！
陳總就有三招回應，第一招係「以大化之」，乜都一句「要睇得宏觀啲」，從兩千年前嘅羅馬講到五百年前嘅威尼斯。第二招係「卸」，一講到有爭議嘅數據，就笑住話「唔好悶親人啦！」輕輕又過咗骨。第三招就係「官腔」，被問到阿董有冇搵佢做部長，佢就好似錄音機咁重複「好相信董生搵到最好人選」，睇嚟陳總絕對有齊做部長嘅潛質。
﹙圖﹚陳總應付問題時從容不迫，絕對有做部長嘅潛質。
E-mail：