由賣辦公室家具轉型賣流動電話嘅易通（312），自從早排帶埋成班證券界人士北上睇廠後，股價由13仙水平一度抽上16仙樓上，但近排就回落到15仙水平，兼且成交大大縮減。
不過經紀陳話，易通仍未炒完，稍後唞一唞後又會炒過。易通噚日微跌0.6％，收15.4仙，成交股數只得1014萬股。
經紀陳話，易通自從換新老闆以來，已經見過唔少證券界人士，而大家嘅共識都係將股價造上，所以由10仙起步至今，雖然偶有唞氣或者換班，但股價一直冇回落過，證明幕後國內炒家實力夠強。
況且股價轉手咁耐，公司都未抽過水集資，所以佢對易通繼續有憧憬。
另外，噚日掛牌嘅旺城國際（2389）真係股如其名，旺場到不得了，收1.29元，較招股價高出36％。不過，經紀黃話隻股最多玩多兩日就收工，所以見好就收，咪太貪心。
慕容小初