黃伊汶（Dior）、蘇志威、朱永龍朱永棠兩兄弟、張耀揚、李嘉欣舊愛陳平治同環球女子二人姊妹組合黃婉君同黃婉佩等，前晚去咗尖沙嘴一間的士高，欣賞英國當紅歌手GeorgeMichael嘅MV首播。大會現場重安排咗男女模特兒跳辣身tabledance，意識極為大膽，甚具SM味道，現場觀眾都睇到情緒高漲。
問Dior睇呢啲表演會唔會流鼻血，佢笑笑口話：「你哋就會流鼻血，我已經過咗十八歲，可以嚟呢啲地方，自從入咗行都少嚟。我聽日（即昨日）會上廣州拍化妝品廣告。」
朱永棠前晚喺現場睇騷，佢看得興起，竟然身痕起上嚟，忽然走咗上吧枱，跳咗一輪舞，非常之high。
葉璇早前因扭傷腰部而辭演劇集《打更急先鋒》，角色已由楊怡頂上，噚日楊怡喺電視城開工，對於執二攤一事楊怡不但冇介意，佢重話：「有機會演出已經好開心，唔會介意咁多，𠵱家每日都會抽多啲時間睇番劇本，希望到時唔會追唔上啦！」
正喺新加坡拍劇嘅鄭裕玲（嘟嘟），噚日接受商台節目《茶煲裏的查篤撑》電話訪問，嘟嘟上月去咗新加坡為當地電視台拍十三集連續劇，佢表示重要喺新加坡逗留一個月，佢話：「個角色都係我嘅拿手好戲，演單身女強人，不過今次要全英語對白，對我嚟講係一個新挑戰。」然而嘟嘟講得一口流利英語，相信冇乜大問題。
白韻琴、謝偉俊噚日出席在美麗華舉行嘅NULIFE十周年紀念慶祝酒會，白韻琴話：「我哋唔係一齊住，我重打算搬上內地住，我已經買咗華僑新村一個幾千呎單位，重係同紅線女做鄰居。我覺得冇嘢做，想做生意，租又太貴，咪回歸祖國，財爺都釣到條美人魚啦！我都要釣番條肥仔魚。」
台灣組合F4嘅吳建豪，日前去咗東京訪問拉丁女歌手Shakira，吳建豪更即時送上朱古力，佢重教Shakira講國語「謝謝」，而Shakira更加要吳建豪教佢寫「夏奇拉」（Shakira）三個中文字。吳建豪話：「這是我第一次訪問別人，真的很緊張！」
李子奇嘅女友井莉前晚出席尖沙嘴嘅公開活動時，雖然唔認自己係李子奇嘅女友，但佢就力撐李子奇，佢話：「我唔係佢女朋友，係好朋友，佢口中嘅女朋友未必係我。我信佢冇鹹豬手，佢好有風度，我諗係拍戲唔小心。」