美股杜指前晚稍為跌穿200日線9936，低見9926後就展開反彈，最後倒升近5點，收10035，1萬點關失而復得。納指早段低見1697，最後微升0.36點，收1713，尚未跌穿去年11月1日1683低位。
美股先跌後穩，刺激港股噚日高開，高見11461，但欠缺承接力，跟住就反覆回落，最後跌24點，收11385。恒指本周埋單計數，共升133點，升幅1.2%。
至於下周港股走勢，主要睇美股噚晚表現，趙飛雲前日第一個假設已經出現，周四晚美股先跌後穩，且看噚晚美國GDP數據是否足以刺激美股向好，令港股下周一高開。
美股雖然出現反彈迹象，但趙飛雲決定睇埋噚晚美股走勢，先至部署下周攻勢。其中一個原因係地產股僅周四調整1日，噚日已經再度回復升勢，雖然可以支撐恒指跌少啲，但唔係太健康現象，地產股調整唔足夠，反而可能拖慢稍後港股升勢。下周主力都係集中於恒指輪9045，長實（001）若調整至71元附近已可收集長實輪9063。
趙飛雲今個禮拜放假無貨一身輕，可以專心入馬場搏殺，希望馬季結束前可以一圓三T美夢。
趙飛雲