呢期電影界鬧得熱烘烘，話題總離不開《星戰》、《蜘蛛俠》及《蠍子王》，受電影的影響，呢啲另類寵物都忽然抬頭，受人注目。咪睇蠍子、蜘蛛呢類節肢類動物個樣咁惡，其實佢哋唔少品種都性格溫馴，適合人類飼養，嫌養貓養狗太普通唔夠個性，大可選擇以下的另類介紹。
記者：張穎倫
攝影：周旭文、陳穎
出沒於馬來西亞等亞洲熱帶雨林嘅雨林蠍，體形閒閒哋都有3、4吋長，甲殼又黑又硬，一雙巨鉗強而有力。單睇外表以為好兇惡，但事實上佢性格溫馴，平時懶洋洋唔多願郁，蠍尾幼所以毒性弱。據老闆透露，自《蠍子王傳奇》上映後，好多人都嚟搵戲入面隻皇帝蠍，但因是受保護動物不能入口，所以唔少人都會選擇外形勁似皇帝蠍嘅雨林蠍，因而銷量唔錯！
售價：$150（國際爬蟲精品店）
養蠍子較有經驗嘅朋友，都會喜歡呢隻來自非洲嘅黑粗尾蠍。事關佢身形瀟灑，每節甲殼顏色都夠晒均勻，十足十一個肌肉健碩嘅猛男。另一方面，佢嘅性格夠惡，毒性又比善良一族強，養佢有一定難度，好多養開易養品種的人，養養吓都會買呢隻嚟養，實行挑戰一下自己。
售價：$450（國際爬蟲精品店）
呢隻嚟自非洲，毒性較弱嘅黃爪蠍，同屬蠍子中善良一族，而且顏色偏黃，外形比一般黑黝黝嘅蠍子多點色彩，冇咁單調，所以亦受唔少初養蠍子嘅朋友喜愛。
售價：$350-$400（國際爬蟲精品店）
喺《蜘蛛俠》電影中，出場蜘蛛有成10多種，但同主角彼得柏加最Friend嘅首選就係斑馬腳蜘蛛。皆因身為地蜘蛛嘅佢，身手拍得住樹蜘蛛咁敏捷，性格比較乖，腳部呈現斑馬紋夠晒靚。毒性方面亦唔強，唔好彩畀佢咬到，只會令人有少少腫，所以彼得喺戲中都有放佢上手玩。
售價：$95（禽獸間）
咪睇佢成身都係毛，就以為佢好恐怖。查實佢性格溫馴，甚少攻擊人類，更加唔會咬人，毒性亦非常弱。佢屬於地蜘蛛，行動好慢唔怕四圍走，你可以放佢喺手上慢慢同佢玩，愈靚嘅紅玫瑰，顏色就紅得更似玫瑰，外表非常豔麗。
售價：$150（國際爬蟲精品店）
睇個名就知，佢嘅特色係腳部呈現粉紅色。雖然屬於樹蜘蛛，但動作不快，好似地蜘蛛咁慢，佢嘅毒性屬於中等，不過卻膽小如鼠，成日都要匿埋先有安全感。
售價：$300（國際爬蟲專門店）
楊千嬅喺《乾柴烈火》內大耍螳螂拳，所以今次小記都趁機介紹兩款較特別的螳螂畀大家認識。
呢隻枯葉螳螂睇落好似塊爛樹葉一樣，一啲都唔吸引。但事實上呢個係大自然賜予佢嘅保護色，匿喺樹枝同落葉之間，一般獵食者都睇佢唔到，夠晒安全。另一方面，佢較易發嬲，動不動亮起螳螂臂，外形可觀性甚高。
售價：$280（禽獸間）
原產非洲嘅蘭花螳螂，一如其名，平時比較文靜，唔鍾意四圍走，靜止時外形更好似蘭花一樣，外觀非常靚。最靚嘅蘭花螳螂，身體更會呈現粉紅色，當花送畀女仔都得。
售價：$200-$450（禽獸間）
1）理想居所
一般8吋×4吋嘅透明水族箱都係呢類小寵物嘅理想居所，箱內鋪設沙石定泥就視乎寵物嘅原產地，例如非洲等沙漠地區就以沙或小石為主，雨林地方就改為鋪泥。
2）糧食推介
佢哋通常都以草蜢、蟋蟀作為糧食，蠍子通常三日左右就可以餵一至兩隻蟋蟀；蜘蛛就大概一星期食兩至三餐，每餐約食兩隻蟋蟀；至於螳螂就最細食，一星期一隻蟋蟀就已經飽飽。
3）應用夾子移動
事實上所有蠍子同蜘蛛都有毒，只在乎毒性強弱之分，而螳螂就係無毒一族。以上介紹的蠍子和蜘蛛毒性都不算強，被咬只會令人紅腫，當然為安全計亦可到醫院檢查，但有心臟病嘅人士就應立即到急症室求診。移動呢類寵物時應利用夾子，而避免直接接觸。
4）壽命
蠍子一般都有約10年壽命；而蜘蛛則約有5、6年，螳螂就只得2、3年壽命。
5）飼養申請
以上介紹的蜘蛛、蠍子及螳螂均毋須申領牌照飼養。
售賣點：
國際爬蟲精品店（22956691）
銅鑼灣波斯富街57號1樓
禽獸間爬蟲兩棲類專門店（23920484）
旺角通菜街184號閣樓