本欄喺上星期六（四月二十號）講起朱經武，話佢係諾貝爾獎（物理學）得獎人，當時並冇doublecheck，只憑記性。唉吔，本欄讀者嘅知識水平高到冇得頂，一寫錯即刻俾人寫電郵嚟取笑。又有一位AlbertChu先生話佢喺侯斯頓大學讀MBA之時，識得朱經武，知道佢係大學內最受歡迎、最受人尊敬嘅教授，但從冇聽過佢攞諾貝爾獎；一位中大畢業生來郵話目前香港學府之中只有一位得過諾貝爾獎嘅物理學教授，就係中文大學嘅「博文教授」楊振寧。
既然讀者乜都知，左丁山不敢怠慢，即刻上網查證，一查之下，弊傢伙，原來自己記性有誤，把馮京當作馬凉。一九九七年有一位華裔物理學家，史丹福大學物理學教授StevenChu得到諾貝爾獎，呢位朱教授嘅中文名叫做乜呢？上網搵唔到，正在失望之際，又收到一個讀者電郵，說明「姓朱的得獎者名字是朱棣文」，OK，多謝晒，問題解決，左丁山錯晒，謹此向朱經武教授、朱棣文教授、各位讀者道歉，鎖你鎖你，以後寫專欄，涉及姓名，當更小心。
據網上資料，攞過諾貝爾物理學獎嘅華裔物理學家有楊振寧（1957）、李政道（1957）、SamuelC.C.Ting（丁肇中，1976）、朱棣文（1997）、崔琦（1998），希望以後陸續有華裔科學家奪得諾貝爾獎！更加高興嘅，會係在中國內地、香港、台灣工作嘅科學家可以攞獎，唔係下下都要靠美國嘅科研環境先至得！