鐵人有好多買咗日版XBOX嘅朋友，都同我埋怨話日版XBOX現時對應嘅遊戲實在太少，而且好多人氣度極高嘅一級正Game，都只係得美國版，而日本版方面，就連推出日期都未定到，搞到大家都有愈玩愈灰心嘅感覺！
不過最近據歐洲嘅行家透露，能夠解破美、日、歐版遊戲嘅全能晶片已經研製成功，如果有咗佢就乜嘢Game都玩到啦！傳聞佢重可能有埋全區碼DVD功能，不過呢個資料就有待進一步證實，預計晶片連改機費用約為80美元（約港幣$600）。
PS2最新猛Game《WORLDSOCCERWinningEleven6》，喺今個星期二朝早終於殺到嚟香港啦！聽講呢個到貨日期重要比日本早成兩日，你都咪話唔厲害！
一如過往嘅《WinningEleven》系列，由於香港行貨一直未能夠解決版權嘅問題，所以今集都只得水貨返，個價俾人炒起，實在勢所難免，新Game落地嘅首日，曾經俾人搶到上$480嘅高價位！好在𠵱家大概回落番$390至$430呢個水平。
不過鐵人收到風，嚟緊呢個星期會係日本嘅黃金假期，相信大批貨要過咗假期先再返到，所以貨源有機會進一步緊張，見到好價位，真係要快啲入貨！
另外，今個星期重有兩隻新Game抵港，佢哋分別係《絕体絕命都市》（$330至$350）同《監視者》（$280至$350），行開Game場不妨留意下！
文：打機鐵人