To我最愛的：
上星期日一個人上咗船。
記得上次我同你喺尖沙嘴海旁見過嗰隻靚到「嘩！」嘅郵輪無？原來呢艘號稱全亞洲第一嘅郵輪，由現在起一直至9月底，將本來航行湛江的行程改行三亞，於是我趁住有幾日假，join咗一個四日三夜嘅三亞、下龍灣tour，希望呢個較長的旅程，令我可體驗真正的郵輪假期的滋味，好讓我為我們計劃的郵輪蜜月之旅作好準備。雖然呢幾日無得去買CK、LV，無得玩過山車、跳樓機，只係遊山玩水，食飯瞓覺，同閒時出去海景露台晒太陽、聽浪聲，想起你，原來已經好滿足。
記者：朱維達
鳴謝：麗星郵輪
入到房間放好行李就即刻帶埋相機去到十二樓嘅露天羅馬式泳池昅昅，當日陽光普照，池水泛光，無三點式女仔戲水聲，只聽到四角處按摩池嘅噴水聲。
不過中間嘅泳池Size就細咗啲，好似我昂藏過六呎嘅高個子，分分鐘可以話畀人聽我游咗十幾個塘。之但係按摩池就真係夠煞食，由日頭噴到夜晚一點，我都急不及待，立時寬衣解帶，實行浸到皺皮為止！
雖然六樓至十三樓都有唔同嘅娛樂設施，但係愛動又好靜嘅我始終最鍾情十二樓嘅瞭望台酒廊，呢間餐廳最好日間到訪，因為嗰個近乎180°觀景窗設計，你可以呷住咖啡之餘，亦可同時觀賞船隻航行時嘅景觀，船頭處更有兩塊顯示板，正確指示出當時郵輪航行嘅方向、風速、速度同位置等，夜晚到訪時更有LiveBand演出。心諗，如果當時你倚在我身旁，那有多完美？
今次四日郵輪之旅不會呆坐船上，除咗前後一日船程，中間兩日可以參加中國三亞及越南下龍灣Tour，兩個地方亦會有唔同嘅行程選擇。就如三亞團會有五個唔同行程，我就揀咗亞龍灣，貪佢多啲自由時間。
由於當地港口水深較淺，所以每次都會用上接駁船往返碼頭，再由碼頭坐巴士到各觀光點，正如我預期，珍珠養殖島、蝴蝶谷、貝殼館都沒啥特別，但旨在睇睇海南島最南、中國最南嘅三亞亞龍灣。當地面向南中國海，經常睇到三層巨浪，莫怪乎呢度有咁多水上活動設施可以租用。嗰日遇上一位嚟自蘭州嘅小姐，佢原來都係山長水遠嚟度假，旨在散散心而已。當我請佢影番張相時，佢已經好似職業Model咁擺晒Pose。但請你放心，雖然佢已經係三亞之花，相比起你，仍差一大截！
團名：亞龍灣自助燒烤晚膳
團號：LSYX-D
費用：成人$350、小童$330
行程內容：珍珠養殖場、蝴蝶谷、亞龍灣廣場、貝殼館、亞龍灣自由活動、自助燒烤晚膳及欣賞民族歌舞表演。
歷時：約5小時
亞龍灣水上活動
水上電單車 150元人民幣?10分鐘
滑水板 150元人民幣?10分鐘
快艇 200元人民幣?一次
遊覽白虎角 400元人民幣?一次
過咗一晚，郵輪已經抵達越南下龍灣，我參加咗一個遊艇旅行團。90分鐘旅程中，2層高嘅遊艇會喺1969個島嶼中穿插，雖然好人導遊哥哥向我介紹島嶼形狀時，梗係要話呢個似隻茶壺、嗰個又話像塊鬼面，我就一啲都想像唔到，不過最欣賞嘅係海上波紋，微風吹拂同古舊嘅引擎聲，好似再沒有甚麼比這更美妙了！間中其他船家會駛着舢舨將剛撈獲的海鮮向船上遊客兜售，一大碟大蟹不過約20蚊港紙，跟住可以請遊艇船員替你即炒，又諗起怕敏感又鍾意食海鮮嘅你……點解呢幾日一個人坐船都總係掛住你？或者真係因為掛住你啦！
LoveVictor
團名：海上遊＋岸上活動（越式午膳）
團號：LHAL-A
費用：成人$250、小童$230
行程：下龍灣海上遊、拜雀市購物或於皇家海岸公園欣賞水上木偶及民族歌舞表演。
歷時：約4小時
排水量：75,338噸 客房：983間
容納人數：約2,800人
設施：14間餐廳、酒廊、羅馬式泳池、男女蒸氣及桑拿浴室、美容及髮型屋、電影院、的士高、夜總會、卡拉OK、購物廊及紅磨坊歌劇院等。
出門提一提
簽證：持回鄉證到中國毋須簽證；持BNO、特區護照者到越南均須簽證，郵輪公司會為你辦妥越南簽證事宜，報名時需出示旅遊證件。
旅行團：可參加獅子星號四日三夜三亞、下龍灣之旅，逢星期日出發，海景露台客房每位$3,199，電話：23177711（麗星郵輪）。