八方噚日講過鄭經翰同旅發局主席周梁淑怡，因對於爭取居港權人士嘅睇法唔同，搞到水火不容，周太重寄信畀商台老闆何驥投訴。
周太同八方講，封信冇要求商台做啲乜，而係問清楚係咪容許主持人可以喺節目內，在無證據情況下人身攻擊，而呢樣嘢同新聞自由無關，大班唔可以混為一談。周太又話封信係私人信件，但被人斷章取義登在報紙，佢都考慮係咪將封信同何驥嘅回覆信公開，讓大家判斷一吓。
至於會唔會告大班誹謗、又或者保留任何法律起訴權利，周太只係一味話「唔講」。佢坦言，自由社會都要有一條合理界線，大家要互相尊重，唔可以亂咁詆毀人。
大班對周太嘅說法反應好大，佢話周太作為公職人員，事無不可對人言，寫得投訴信就預咗被人知，如果周太以為呢封係私人信件，就真係太蠢、simpleandnaive，係低質素嘅政客喎！
雖然大班鬧還鬧，但仍想大事化小；佢話如果周太唔再撩起把火，佢都唔會再開咪拗個沒完沒了，佢話：「我哋加埋都過一百歲，兩個老人家喺度鬧，搞乜鬼吖！」
而商台本身一於置身事外，講明主持人嘅意見，並不代表該台立場；言論係咪有偏見，公眾自會判斷。
E-mail：