港股噚日略為下跌24點，收11385，成交亦縮至79億元。
下周三內地開始放五一長假，放到5月8日至復市。本港莊家股可能會唞一唞，特別係光通信（603），因為炒起此股主要係中資錢。此股噚日再升6.2％，收0.154元，成交1.34億元。
益來（082）噚日突然宣布要押後至6月27日公布業績，而未經審核嘅業績錄得虧損7619萬元，即係話真正嘅業績都唔慌好。不過股價噚日仍然勁升14.4％，成交達1701萬元，似乎愈炒愈有鑊氣。黑客話，大股東可能會爭取時間賣殼都唔定。
勵晶（575）前日急升22％，有人以為佢賣殼賣得成，結果俾聯交所要求停牌解釋股價升因。其實阿虎一早講過收購勵晶並非易事，就算凱基好有誠意，都要用好多時間睇佢盤數。
中國數碼信息（250）近日成交增加，日日過千萬元，股價噚日上升2.9％。
Cookie話，通常此股成交大，股價出現異動，就有人傳係于品海同人傾緊賣盤，相信今次都唔會例外，不過賣唔賣得成就真係難估計，但最近聽講有個中資同佢傾得好密。
港股最近頻頻被大行調高評級，而3月份本港出口又錄得13個月以來首次回升，樓市新盤去貨速度不俗，若情況持續，相信香港人存喺銀行嘅資金好快就會釋放，到時股市及樓市至可以真正復活。
阿虎