今個星期想知超市有乜特價貨品？等小記即刻話你知，惠康本周全線有以下特價精選貨品。買珍珠米送手表，價值重高過買包米，解渴嘅椰青、消暑西瓜，本周都大平賣，重有每日都需要嘅油，本周有特級粟米油平四成有多，有咁多特價精選，可以慳番唔少錢，呢個周末又可以成家人一齊食餐勁，隨時重豐富過出街食自助餐。
記者：陳冰麗 攝影：林栢鈞
ImageGirl：CoCo
珍珠米飯味香，米粒大，好有咬感，呢款嚟自日本嘅禾味牌珍珠米，品質同樣有保證，嚟港大概只有半年零，包裝精美，好有卡通Feel，見到都會被吸引買番包，家陣惠顧一包珍珠米，重免費送一隻膠手表價值$30，手表重好cutie，顏色又鮮豔，粗戴都抵。
原價$24.9/3公斤
食慣泰國香米嘅，本周亦有着數，凡買金象牌頂上泰國香米八公斤裝一包，隨包裝附送$16聖安娜西餅現金券，除咗有嘢送，每包米重比原價平咗$14.9，認真抵。
原價$71.8/8公斤
現凡購買Qoo任何果汁1.5公升兩樽，即送多1樽345毫升細樽裝Qoo果汁價值$6.4，有橙汁、白提子汁及蘋果汁任揀。
原價$16.9/1.5公升
小記知道好多主婦都比較鍾意用粟米油煮餸，粟米油低膽固醇，所以本周介紹嘅呢款粟米油必定啱大家，佢含不飽和脂肪，更適合老人家食用，每罐容量2.9公升只係二十零蚊，比原價平三分一有多。
原價$41.8/罐
淘大食品種類多，呢款日式餃子係其中一款搶手貨，街坊黃太就趁本周超市大平賣，一次過大量掃貨，足足買咗十包，佢話呢隻餃子好好食，無論煎或蒸都可以，因餃子加入咗豬肉、椰菜、馬蹄等，食落甘香又爽口，每包有9件餃子。
原價$14.9/包
灣仔碼頭水餃味道一向都唔錯，種類又多，包括有白菜豬肉、韭菜豬肉、鮮魚香荽、鮮魷白菜等餡料，放湯或煎都惹味非常，至啱無時間煮飯作為醫肚方便食品。
原價$17.5/包
家陣未必可以輕易食到柑，適逢惠康現正出售嚟自巴基斯坦柑，重賣到好平，每個足足比原價平一半，柑迷又豈可錯過呢！
原價$1.8個
火龍果汁多清甜，以往至少要十零蚊個，後嚟漸漸至平番啲，街市價最平都要都要三個零至五蚊個不等，家陣每個三蚊有找，更加係抵食。
原價$5.9個
炎炎夏日，飲椰青絕對可以消暑解渴，椰青糖份低，汁清甜，解渴又滋潤，比飲汽水有益得多，飲咗椰青水，重可以食埋椰肉，用佢燉湯又得。
原價$7.9個
淘大點心同樣大平賣，現凡買任何點心兩包，更送多一碗淘大叮叮粥，包括有艇仔粥、皮蛋瘦肉粥、柴魚花生粥任揀，價值$12.9一碗，多買多送㗎！
原價$14.9/包
唔想骨質疏鬆最好及早吸收多啲鈣質，飲奶係唔錯選擇。值得推介呢款荷蘭子母高鈣奶，兩支容量一公升高鈣奶，再附送兩支細容量200毫升純牛奶只係$22.9，單買大支裝高鈣奶都要$14.5。
西瓜愈賣愈平，上周特價咗只係$2磅，本周再度跌價，兩蚊磅有找，抵到笑，重係無核嘅西瓜㖭！
原價$3磅