米路天奴域鍾意喺訓練期間俾球員玩網式足球就係人都知，噚日睇南韓操練時，居然連一向軍紀嚴明既軒迪克，都俾球員鬆一鬆。諗番起上嚟，米路最近好似去過西歸浦同軒迪克交流，唔通「神奇教練」嗰時過咗兩招畀呢位「荷蘭佬」？
喺意大利佩魯賈搵食既南韓中場安貞煥，噚日練習定點罰球時，就唔知點解成日過唔到假人牆；而同樣係中場嘅兩位在日本j-league落班嘅柳相鐵和朴智星，就腳腳七注命中目標，最後當然搞到呢位國家隊最高級數中場面目無光，佢㷫起上嚟重將個波踢去另一個場，一啲風度都冇。
中國隊噚日係仁川文鶴運動場操練，就遇正場館大銀幕測試中，唔知測試員係有心定無意，大銀幕喺中國隊俾傳媒朋友影大合照時，居然顯示咗南韓贏中國三比一嘅結果；雖然係唔係事實就今日至知，但咁搞法都唔知喺度攞景定贈興。咁啱就係噚晚南韓十九歲以下青年軍真係以三比一贏咗中國。
重有一個多月，仁川就正式舉辦世界盃，不過，噚日由仁川中央車站行去球場時，就發現球場對外正在有工程趕緊。修路工作將一塊塊磚頭砌成個大廣場，預備將來俾球迷入場睇波前，喺度飲下啤酒，聚埋一齊講講波經。