滕麗名早排幫美國皮鞋ROCKPORT做廣告專輯模特兒，佢去咗九龍塘一個公園同灣仔一間法國餐廳取景。據知，滕麗名呢次做模特兒得到五位數字嘅酬金。
滕麗名分別以背心配及膝褲嘅便服，以及tubetop配短裙嘅性感打扮拍廣告，配襯ROCKPORT唔同系列嘅皮鞋同涼鞋。
腳踏涼鞋嘅滕麗名，着住一身便服喺公園拍攝外景期間，佢跳跳紮好開心，重揸住杯凍飲慢慢歎，索性寓工作於娛樂。然後滕麗名以較為性感嘅裝束，去灣仔法國餐廳繼續拍攝，佢着住條短裙，展示一雙長腿同時款涼鞋，典雅大方。
以前王晶話要開戲真係用把口係咁講兩吓古仔，啲老闆就願意支持佢開戲，但𠵱家市道唔好，好多導演都冇戲拍，王晶想開戲一樣唔係話咁易。好似佢𠵱家雖然係電影動力嘅話事人，但每開一部片都要嗰幾位董事同意先可以。不過王晶一向唔會只得一條水喉，佢始終有生存方法。
鄭文雅同一班慧妍雅集港姐噚日喺金鐘港麗酒店，宣布成立「慧妍雅集－AFC淺山之家愛心基金」。向來喜歡運動嘅鄭文雅發福唔少，鄭文雅話：「係肥咗呀，女人有番咁上下年紀唔可以太瘦。」不過鄭文雅否認身形發福係因為懷孕，佢話：「幾時生就聽天由命啦。」
霆鋒日前同前女友戴辛尉喺內地一間的士高剪綵活動碰面，一對戀人互不瞅睬，男嘅重當對方透明。事後戴辛尉同馮仁昭解釋，話當日大家喺後台唔單止有傾有講，霆鋒重主動話要作曲畀佢。至於點解喺台上又冇眼神接觸，佢話喺呢個敏感時刻，打招呼重更加俾人做話柄。
樂壇新人關心妍噚日幫港台節目《好男好女》做客席主持，訪問十歲嘅鋼琴神童朱天麟，關心妍話：「我都係喺加拿大長大，佢又喺加拿大返嚟，所以咪搵我訪問佢，可以傾吓喺加拿大嘅生活，我都想請教吓佢啲鋼琴技術，咁細個就彈琴彈得咁叻。」
王家衞上年同韓國啲電視台簽咗合約，話會合作拍電視劇，但𠵱家重未見影，不過王家衞會喺下半年先拍《2046》，但木村拓哉就真係等到頸都長。𠵱家木村喺日本聲勢係咁跌，所以佢嘅事務所都希望木村可以憑呢部戲翻身，成日都催促澤東公司快啲畀開工通告佢哋。
正喺日本宣傳所代言雪糕嘅陳慧琳，最近同幾間唱片公司傾緊唱片合約嘅事，黃栢高早排一直冇同佢傾續約，完全係因為鄭東漢九月離開環球，而環球旗下公司正東唱片嘅負責人黃栢高喺十二月約滿，如果鄭東漢有好路數，黃栢高必然會共同進退，但鄭東漢遲遲都未決定動向，搞到陳慧琳都唔耐煩要簽其他公司。
苑瓊丹噚日同堪輿學家麥玲玲喺「燦師傅穀倉V」宣布，星期六喺「燦師傅穀倉V」幫單身人士算命同傳授秘技，等大家覓得合心水嘅另一半。麥玲玲重話睇過謝霆鋒嘅命格八字，話佢唔會有牢獄之災，不過佢八、九月間運勢最弱，而霆鋒嘅姻緣運，係要同大過佢或者細佢八年嘅女人先夾到。