鄧肇堅維多利亞官立中學智能卡系統昨日朝早啟動，第一個在門口用八達通「嘟」機點名嘅，就係F.1A班學生曾蔭權，學生編號84014740，返校時間係十一時二十五分。
冇錯，這個曾蔭權即係政務司司長煲呔曾。其實煲呔係為該校主持智能卡啟動儀式，學校就順手幫煲呔整咗個「學生」八達通，有班有名有埋冧把。不過煲呔五十幾歲人重係讀F.1A班，返學重遲大到，都幾搞笑。
為招呼貴賓，學校安排一班讀中一嘅英文戲劇班學生表演活動學英文，煲呔睇得好投入，重好好興致咁有問必答，答咗師生七條問題。
問答全程都係用英文，問題都幾有趣，例如問：你鍾唔鍾意睇Drama？得閒會做咩？煲呔有乜咁特別，令你咁鍾意戴？點睇自己個花名叫「煲呔」？到底一共有幾多條煲呔？
看來「煲呔」一名深入民心，煲呔曾就興致勃勃咁講解Bowtie名字由來，重話自己鍾意打煲呔有三大理由，第一就係平，因為用布都少啲；第二因為襟污糟；第三因為“Iamshort.”曾司長竟然直認自己矮，打呔要就啱前面長過後面，打煲呔就唔使朝朝試來試去就啱位咁麻煩。
煲呔最後忠告學生外面個世界風大雨大，一定要有良好溝通同表達能力，得閒要講多啲英文。
E-mail：