英文月刊AsianBusiness（亞洲商業）寄來通知，正式宣佈停刊。呢本英文雜誌，半賣半送，經審核過嘅流通量係七萬五千幾本（二○○○年下半年數字），出版公司係TimesPublishing（HongKong）Ltd.，如果左丁山冇記錯，幕後老細就係新加坡大公司，專營書局及出版各類雜誌，財力幾雄厚㗎。
點解要執笠呢？理由好簡單嘅啫，出版人及總經理LeeFeiChan喺封信度講：「環球經濟下滑，影響廣告收益，冇法子唔停刊。」左丁山唔經唔覺睇呢本雜誌十年左右，一路發覺佢嘅廣告近年顯著地減少，事實上，好多本英文雜誌都薄晒，經營艱難，不獨《亞洲商業》為然。但凡係地區性雜誌，要爭取一啲對成個區都有人啱睇嘅廣告，譬如花旗銀行、日產汽車之類，但過去幾年適逢日本不景，日本公司大幅削減廣告，地區性雜誌好索氣。好似《亞洲商業》二○○二年一月號，全書共七十頁，連封面封底，得十個廣告，你話幾難捱，淨係畀郵費印刷費都唔夠呀！
《亞洲商業》嘅總編輯係香港人JamesLeung（梁宏福），係《亞洲華爾街日報》二十幾年前嘅創刊記者，亞洲採訪經驗豐富到極，梁兄啲英文，已達爐火純青境界，以前得閒做自由撰稿，嗰陣時，啲鬼佬大班演講，亦專登搵佢執筆寫演講辭，佢無論寫乜嘢題材嘅文稿，嗱嗱臨就可以交稿，要淺白又得，要賣秤故作高深亦可以，不愧為高手也。