美股仍未見有止跌迹象，杜指前晚再跌58點，收10030，噚日外圍期指更1萬關失守，有向下考驗200日線9939迹象。納指形勢更加差，收1713，收市價創5個月新低。
恒指噚日走勢依然硬朗，午市一度升上11440，但最尾半個鐘沽壓明顯增大，期指亦轉炒低水。趙飛雲憂慮美股噚晚如再急挫，港股難免受拖累，加上倉內恒指輪9045亦有9%利潤，所以先行沽出套利，保持主動權。
假設美股噚晚出現先跌後穩嘅情況，而今晚美國公布GDP數據又能振奮人心，令美股大幅反彈，則下周一港股可能裂口上升，配合好友期指結算，到時肯定要追貴貨。雖然有咁樣諗法，計落值博率唔係太高，所以都係做穩陣派，將帳面利潤套現，情願到時追貴貨。另一方面，如港股向下調整，便能提供低吸9045機會，可以重新部署攻勢。
長實（001）噚日跌1.25元，收73.25元，10日線目前喺72元水平，70元附近支持力更大，可以喺呢個區域伺機吸納長實輪9063。趙飛雲始終相信恒指整固後，一定上試萬二點關口。噚日又見霸菱開聲增持港股，資金將繼續流入港股。
趙飛雲