美聯日前大鑼大鼓話周六招聘日要請500人，聽講兩日內已收到316個電話查詢。另一邊廂嘅中原其實亦不斷請人，只不過唔高調，中記人士對蘭西講，現時中原已有2000人，重響呢幾日搞招聘（周四至周六）。地產代理行咁積極請人，即係表示呢行有得做，請人請得咁勇猛，分分鐘失業率有改善都係靠佢哋。
豪宅近期買賣活躍，世紀21鄧慶年話一名移居美國多年嘅業主，亦趁勢將中半山龍景樓中層D單位放盤，該行透過長途電話與業主傾價，最後以1030萬元成交，面積2500方呎，呎價4120元，屬市價。
由投資者持有嘅西半山克頓道2號低層F室，面積911方呎，連車位剛以440萬元沽出，美聯物業黎志強話，原業主因在內地公幹，所以要「送票」到廣州才能促成交易。
利嘉閣地產噚日搞員工海上睇樓團，30幾人參加，由深井睇到東涌，足足成3個鐘頭，加深同事對每個樓盤嘅認識。
長實嘅矚目豪宅紅磡海名軒，代理透露，因為「小超」李澤鉅今日會親自到現樓視察，長實下令響上午10點到12點，唔畀代理響樓盤視線範圍內出現。
蘭西