美林睇好地產股，ING霸菱叫人增持港股，市場又傳出有資金流入掃港股，港股噚日略為回軟即有買盤支持反彈，再升12點，重上11400水平。
雖然華資經紀認為港股差不多已經見頂，但外資經紀就認為資金流入似乎剛剛開始，後市應該未升完。不過，美國今晚公布第1季經濟增長數據，市場人士普遍估計得好好，如果開出嚟係另一回事，咁就大件事。
中移動（941）成交持續增加，噚日超過10億元，收25.45元。中移動請咗班分析員到廣東及山東等地考察，唔通有料到？不過Cookie話只係正常活動，應該冇咩特別好料公布。
光通信（603）配股後復牌，股價一度跌逾6%，但高盛竟然排隊入市掃貨，令股價倒升2.1%，成交達2.4億元，睇個勢就知幕後大戶相當認真。
唔知大家重記唔記得，高盛曾經喺2元收集聯想（992），然後將聯想一口氣推高至接近16元水平，唔通高盛又想故技重施？
合興（047）5送1紅利認股證，刺激股價勁升32.7%，收0.345元，較紅利認股證行使價0.27元有溢價28%。若果只係為咗要令股證持有人行使認股權，已經毋須繼續將股價推高。此股一向冇咩鑊氣，成交又唔多，相信冇人會為咗炒股證而繼續推高正股股價。
益安（082）前日略為回吐後，噚日急升18%。今次黑客勝i師傅一仗，黑客又點阿虎買隻慕詩國際（130），佢話此股有排升，好快有料到。
阿 虎