日本Japan
兩年前第一次到沖繩北谷町嘅AmericanVillage確實令我興奮，多嘢Shop之外唔在講，最記得嘅係俾我搵到個美日混血女仔做個臨時Model，正！上個月重遊舊地，取而代之嘅係呢四朵日本花花，雖然當日落住雨，但仍不減退四朵花花嘅掃貨熱情（睇佢哋咁High就知啦！）事實上，喺北谷町購物區見到嘅絕大部分都係二十來歲嘅小伙子，除咗當地居民，金髮仔女都唔少，因此，除咗反映呢度係潮流入貨地之選，亦相對反映出我已經一把年紀咯。
記者、攝影：朱維達 鳴謝：縱橫遊、日本觀光振興會
這間東南亞精品店好易搵，只要去到摩天輪下面個商場地下就會見到。話佢係東南亞精品店一啲都唔誇，內裏賣的可以說是集該區經典手信之總匯，越南、印度、印尼等國家的手工藝品都可以在這裏找得到！
我覺得Ramayana最吸引嘅有兩樣，其一係來自越南的小器皿，椒鹽樽以至其他如豉油樽都係的的骰骰，表面髹上花紋圖案，雖然較易打爛，但只要你同店員講要搭飛機，佢哋就會好細心咁加多啲發泡膠粒，包到靚靚畀你；其次吸引嘅就係──女店員嗰分甜蜜嘅笑容，佢重義務幫我攞起來自印度嘅特色布袋，襯埋簡直一絕！
地址：北谷町北前1-1-4
電話：（81）98-9837878
傳真：（81）98-9837877
網址：
最初重以為世界盃將至，到日本旅遊一定有唔少世界盃手信賣，事實卻不然。或者只在沖繩而言，我除咗見到穿上日本主、客隊衫嘅牛奶仔女、印有入圍賽國家國旗嘅世界盃紀念版可樂之外，就鮮見世界盃產物。位於Ramayana隔籬嘅Breeze，門前就放咗多隻size嘅世界盃吉祥物毛公仔，於是入去再徹底搜索。
若果你認為這間是世界盃專門店，那便錯了，原來舖頭賣的是毛公仔系列及玩具精品，若果你認為Breeze只賣毛公仔，那你又錯了，店內右邊售賣化妝用品，花款可謂是北谷町數一數二，雖然我無特別喜好，但都被那一支支好似酒吧裝置的香水瓶吸引。香水味有十多種給你選擇，該店的人氣No.1推介，名叫愛貓，是最多人選擇的香味，亦可一試據稱只有沖繩才可買得到的優苦瓜味。
地址：北谷町美濱15-69
電話：（81）98-9837201
傳真：（81）98-9837202
到北谷町，你會發覺部分舖頭賣嘅貨品都會一樣，但又係必掃之列，因為可能只有呢度先至最正宗、最多、最齊，講嘅當然係軍事服裝用品，正由於此地鄰近美軍基地，北谷町會有很多二手軍用服飾賣，而且價錢亦相宜。
北谷町有Warehouse、AmericanDepot同Soho店等都有該類貨品售賣，但我覺得後者規模較大較齊。Soho店分兩層，地面賣嘅係美國式貨品，充滿紅番色彩嘅手袋、錢包、夏威夷恤、可樂電話擺設等，而下層則是軍飾專門店，左面部分擺放了美國軍服、用具，而另一面則集中歐洲軍服，部分大褸真係型到爆，但天時暑熱着上身又誇啲，可以考慮短袖天恤、背心，價錢牌標明係“USED”，但都好乾淨，而且呢啲軍服要洗過多次先叫型㗎嘛！百幾蚊有件，真係幾抵着。
地址：904-0115北谷町字美濱9番地12
電話：（81）98-9827785
傳真：（81）98-9827786
簽證： 持BNO、特區護照或CI者均須簽證。查詢：25221184（日本領事館）
旅遊諮詢： 五日四夜乘日航往返沖繩團費$5,290。查詢：23688188（縱橫遊）
貼士： 北谷町購物區又叫做AmericanVillage，但若果你問當地人AmericanVillage或是美國村在哪兒卻又未必一定知道喺邊，所以下次你需要搭的士至此，不如就講喺北谷町Jusco落車，司機會較易明白。