曼聯實力雖然好強，但係弊在好似中咗魔咒咁，近排頭頭碰着黑，話唔埋今屆會食白果。
本來已經有碧咸受傷嘅曼聯，雖則有堅尼傷愈復出，但喺前晚對利華古遜場歐冠盃四強首回合，無端端又有加利仔斷腳；而最邪就係加利仔重要同碧咸傷埋同一個地方（即係斷咗左腳跖骨）。曼聯𠵱家場場比賽都有主力傷，嚟梗呢幾場波都唔知點算。
咁都不特止，佢哋又俾旁證累，搞到唔可以拉近同超聯榜首阿仙奴嘅距離。事關前晚喺阿仙奴對韋斯咸場超聯上，韋斯咸前鋒簡路迪嘅射門明明過咗白界，個旁證又判唔入。雖則阿仙奴最後都贏二比○，不過若然俾韋斯咸先入一粒，睇怕兵工廠真係未必咁容易攞到呢三分。
家陣曼聯落後阿仙奴五分，重要喺餘下三仗冇咗碧咸同加利仔兩件主力，挽吓手今屆隨時一無所有。
曼聯領隊費格遜喺鏡頭前好似好有風度咁，背後原來一樣輸唔起。事緣喺曼聯打和利華古遜二比二之後，俾我求大俠見到佢啲惡行；佢老人家唔知係咪㷫得滯，竟然將口中嘅香口膠掟落觀眾席。如果下次有幸到奧脫福球場睇波，見到費爵爺企咗喺你上面，咁就要醒水速速閃嘞。
阿仙奴領隊雲格認真有情有義，喺前晚場波特登在完場前三十秒安排迪臣後備入場，等球隊如果攞到聯賽冠軍，佢都有資格（一季聯賽要踢十仗或以上）攞冠軍獎牌。另外，迪臣重可以跟喺九七至九八球季幫阿仙奴攞超聯冠軍的四位元老阿當斯、基昂、施文同𠵱家踢緊韋斯咸嘅溫特本短聚，場面真係感人。
英格蘭國家隊領隊艾歷臣不嬲都唔鍾意帶埋女友去球場睇波，但係前晚就好罕有咁帶埋女友一齊去高貝利球場睇阿仙奴對韋斯咸場英超。艾歷臣近排因為啲桃色新聞，搞到佢自己俾英國傳媒死咬住唔放，佢高姿態咁帶個正印出嚟畀大家睇，係人都知佢想闢謠啦！