香港經濟差，廣告部同八方講要努力搵生意，八方就話約聯交所班要員肯幫幫手，報紙廣告收入實好好多。話說八方噚日打開份《信報》，一共有七個「吉版」，三個寫住「廣東科龍電器致意」、四個寫住「南華集團致意」。
八方問《信報》老友，原來科龍本來訂咗七個版出業績，南華就訂咗四個版，但係有關通告去到聯交所上市科，搞到凌晨三點都未批准，故惟有開「天窗」。還好科龍另外有四個版排咗喺同一張紙度，可以唔印就算，如果唔係《信報》一口氣開十一個天窗，怕且可以列入《健力士世界紀錄》。
老友又話，一個全版廣告約六萬，規矩係趕唔切要照畀錢，最多畀番個折頭，即係《信報》照袋幾十萬廣告費，連油墨同紙錢都慳番，更好賺者係科龍同南華集團今日見報要照登番十一個版通告，一單生意收兩次錢，真要多謝聯交所。
E-mail：