近期工業股批股集資一浪接一浪，剛剛宣布業績升32％嘅創科（669），噚日晏晝批股，集資額有成3億幾4億銀咁多，配售代理亦係上次替建滔（148）批股嘅C記。
上次建滔批完股之後，股價企得好硬淨，希望今次C記亦幫幫手，令創科股價企穩。
經紀黃話，繼創科之後，另外一隻被傳會批股嘅工業股，竟然係剛剛被多間外資行品題嘅毅力工業（332）。
毅力股價早排由3.80元高位被質落至最低2元，點知喺2.50元出現多手大手成交後，跟住出現多份大行報告推介，股價就好似坐咗火箭咁一路升，噚日微升1.4％，收3.575元，睇怕就快重返高位。
經紀黃話，毅力𠵱家個勢咁好，有證券行撩佢批股絕對唔奇，但工業股批股一隻接一隻，芬佬食唔食得晒咁多就真係好難講。
跟創科做同類生意嘅旺城（2389）今日掛牌，隻股之前唱得咁行，希望會有好表現。
慕容小初