來自上海的新人江彬，下月將在港推出唱片，在勇闖本地樂壇前，江彬先做足功課，了解一下本地歌手的形象和歌藝。江彬批評鄭秀文的歌十年如一日，而王菲在婚變後，歌路極端，亦唔夠投入。
現年二十二歲的樂壇新人江彬，最近來港闖樂壇，她將於下月推出廣東和國語EP碟，希望以過江龍的姿態在新人輩出的樂壇爭一席位。
江彬曾在內地的歌唱比賽中奪獎，歌藝潛能因而被發掘。江彬來港發展前，她亦細心分析過樂壇現今的形勢，早前已語出驚人，大膽批評王菲、陳慧琳、楊千嬅和鄭秀文只是偶像，卻不懂唱歌。
江彬日前在西貢拍照，對本地樂壇男女歌手的評價彈多於讚。江彬表示最欣賞的女歌手是鄧麗君和陶喆，而男歌手是李克勤、張學友和許志安。
問到江彬為何覺得王菲等天后歌手不懂唱歌，她說：「我覺得佢哋太重包裝，王菲係天生金嗓子，但自從佢婚變後，我留意到佢唱歌唔夠投入，好求其，歌唱路向重好極端。
「鄭秀文嘅歌好商業化，十年如一日，完全冇驚喜，只係形象常變，給人鮮明印象。陳慧琳係偶有驚喜，佢都算係樂壇好努力嘅一個。楊千嬅把聲就完全先天所限，表現成日都唔見突出。」
評過樂壇女歌手，又怎少得男歌手，江彬又說：「我覺得張學友同李克勤把聲絕對得天獨厚，聲音悅耳。而許志安嘅情歌係絕對有質素保證，加上佢嘅形象又健康，咁多年成績有目共睹，係作為我哋新人嘅學習目標。」
至於謝霆鋒和陳奕迅這兩位年輕偶像派，江彬就不敢恭維，她說：「謝霆鋒係好努力建立佢嘅反叛形象，歌藝就見仁見智。如果時下年輕人都模仿佢，咁社會一定大混亂，唔知佢知唔知道自己嘅影響力有幾大，應該檢點啲。陳奕迅把聲雖然好聽，音樂細胞好強，但係佢嘅形象真係麻麻。」
採訪：比華利
攝影：林德雄
服裝：KOOKAI
髮型：JimmyChan（Oasis）