日本手機已經玩到65,536色彩芒，香港都總算有部4,096色彩芒機玩玩。內置鏡頭手機響日本真係多到十隻手指都數唔晒，幸好香港都剛剛有部可插鏡頭的手機玩影相，都叫做拍得住日本。不過，東瀛手機界已經有新突破，就是用手機都可以睇動畫兼自拍短片，各位香港用家們今次問你點追？
記者：招佩珊
J-K51是J-Phone剛於3月推出的新機種，重點所在是J-K51可拍攝約長5秒的動畫，短片儲存在機內，亦可傳送給朋友，只要對方用的是對應機種就可以觀看。而J-K51可拍攝128X160Pixels的相片，以機內3MB的記憶容量來計算，約可影到800張相片。此外，亦可下載各種以Java語言所編寫的程式，如遊戲或Screensaver等。
J-SH51同樣可以拍攝約長5秒的動畫，而且拍攝時重可以加埋聲音，儲存在機內自己睇或者Send畀朋友都無問題。若然唔拍短訊，當然可以用個內置鏡頭來影靚相。不過唔單止玩影像，連「聲」都唔放過，32和弦鈴聲已經夠晒靚聲，J-SH51更備有音樂播放功能。只要將手機同CD機或MD機接駁進行錄音，歌曲會儲存在SD卡內，只要插番張卡就有歌聽。
略嫌5秒動畫睇得唔夠喉，C5001T可播放長達90秒的動畫，不過所睇到的動畫並非一些自拍短片，而是MPEG-4格式的動畫。用家可經手機上網下載各種不同類型的MPEG-4動畫，好似廣告、MV、電影短片，再配合C5001T的4,096色彩芒，手機就變成一個迷你電影院，隨時都有戲睇，當然套戲亦同樣迷你，因為C5001T只能播放90秒的動畫。
前後喇叭播和弦鈴聲
和弦鈴聲是日本手機的強項，由8和弦至16和弦，到家陣的32和弦，手機鈴聲確實好聽到暈。既然有靚聲，單靠一個揚聲器來播放未免有點浪費，於是備有32和弦鈴聲的P211i就索性加多個揚聲器，機身前後加埋合共有兩個喇叭，何止好似有隊Band搬入手機，更加是環迴立體聲。
日本手機界內置鏡頭的手機家陣多到十隻手指都數唔晒，好似最近推出的J-SH08及J-NM02，兩者均內置鏡頭，J-SH08最特別的地方，是機內唔單止有個TFT彩色顯示屏幕，連機面都有個256色彩芒，有來電時就可以睇到彩色的來電提示圖案。至於J-NM02是Nokia第二部於日本推出的影相手機，上次推出的有鏡頭機J-NM01只得256色彩芒，今回來個大躍進，玩到65,536色。