數碼影音：
韓產MP3機新功能　自製歌曲冇腦宣言

自從MP3機升級回歸力戰MD之後，好多廠商都絞盡腦汁，不停為旗下產品搞增值。不過家陣仍有好多人對電腦傳歌有所抗拒，任你部MP3機點勁，始終都提唔起興趣。今日介紹兩部新款MP3機仔，有賣相有內涵之餘，重可以透過AudioIn插頭，簡單將各種音源壓縮成MP3格式，完全唔使用電腦。

記者、攝影：徐影龍

卡片型錄音王DM-U128
呢部韓國廠商MSC製造嘅新款MP3機，型號為DM-U128，最大特色就係機身設有AudioIn插頭，供用家駁上各式影音產品（如Discman、收音機或電視遊戲音樂等），再將普通Analog音樂即時壓縮成MP3檔案，簡直有如一部MP3Encode器，效果亦比以MIC那個小孔收錄好得多，流動機種中算少見。
機身內置128MB快閃記憶體，約可收錄32首標準壓縮嘅MP3音樂，差不多等於三隻音樂CD嘅容量，搭長程交通工具都唔怕聽厭。
另外，機身亦備有USB傳輸介面，可用作接駁電腦傳歌之用，而且傳輸軟件還有調校MP3檔案壓縮比率功能，等用家可於音質及容量上作一選擇，可惜透過AudioIn進行錄音的話，壓縮率只得一個標準，冇得揀！

機身面積細過卡片
DM-U128機身極盡細小，面積比一般卡片更細，厚度亦不足1cm，似塊餅乾多過似部MP3機，真正放落衫袋都唔覺重。DM-U128支援最流行嘅MP3同WMA格式，除播歌外，透過機頂一個小孔，可做到現場收音功能，以128MB計算，約可收錄八個多小時聲音，上堂聽書或做訪問都咁啱使。
DM-U128機內預設使用專門鋰電池，不過跟機附有一個3A筆芯電擴充盒，不但補充電池方便，若兩者配合使用，播歌時間更可達8至10小時。

抵讚：機身極纖巧，AudioIn即時錄音功能用途多。
要彈：屏幕太細睇得辛苦，不設擴充插槽限制大。

JENFUL
查詢電話：24200086

萬能型錄音王PD-095-01
另一部由PDHercules製作嘅MP3機（型號PD-095-01），同樣標榜可即時將音源壓製成MP3格式儲存，令自製音樂都具有CD質素。可惜PD-095-01只支援MP3一種檔案格式，若用家儲有大量WMA格式音樂的話，便需透過附送之光碟程式轉換，才可下載至機內收聽。
除播放及即時製作MP3外，PD-095-01亦設有FM頻道接收器，等用家聽歌嫌悶時，可轉為聽電台節目，當然亦可接收電台新聞，令用途更為廣泛。值得一提係PD-095-01支援ID3Tag，即附喺MP3檔案內之音樂資訊，在屏幕上顯示歌手名稱、歌名等資料。

加強現場收音效果
機身除LineIn插頭接駁各式影音裝置外，重額外附加一個MicIn插頭，可直接插入咪高峯作現場收音之用，較一般MP3機以小孔錄音比較，好處當然係音質會清晰得多，算係一種幾體貼用家嘅設計。
PD-095-01機內設有64MB快閃記憶體，機側可插入SmartMedia記憶卡作擴充之用，最大可支援128MBSM卡，就算聽歌加錄音都夠用。電池方面，PD-095-01使用兩粒3A筆芯電，好處係補充上比專用鋰電方便，唔怕戶外聽歌冇電用。