在香港開小型時裝服飾店，一般會喺商場內開設，不過如果人流唔夠，店舖隨時入不敷支，關門大吉；但人流旺就自然租貴，賺埋都唔夠交租。若果喺深圳東門老街前衞店商場內做生意，雖然人流一般，但勝在租金特平，又有另類顧客幫襯，所以生意仍大有可為。24歲嘅阿Cat，去年就以6萬蚊喺上址開舖賣前衞服飾嘢，由於貨物緊貼潮流又夠In，所以每個月均有盈利，好過喺香港捱騾仔，甚至冇嘢做咁慘吖。
記者：梁煒健
攝影：陳智良
24歲嘅阿Cat，之前喺香港一間出入口公司做文員，所以懂得窿路攞貨，「因為我唔鍾意沉悶嘅辦公室生活，加上喺香港做嘢壓力大，自己又鍾意扮靚，所以就北上闖一闖，開咗呢間『IN』潮流服飾店。」
去年年中，阿Cat知悉東門嘅老街前衞店商場1樓招租，當時約100呎嘅地方租金需?8,000，商場本身又有個大商業牌照，所以場內店舖喺大牌照下不用自己申請個體戶營業牌就可以賣嘢，十分方便。加上租金已包括管理費，極之適合港人北上創業。而阿Cat因為喜歡商場內的前衞飾物夠特別，睇舖時覺得啱Feel，就即刻落定。
阿Cat創業小錦囊
1﹒與商場合作，優惠特別多。
2﹒貨種要夠特色，人流唔夠一樣掂。
3﹒天氣轉得快，散貨更要快。
4﹒親自視察周圍商店售賣貨品，避免入同類貨種，及提供其他貨以供顧客多點選擇。
5﹒以自己興趣開舖，「他他條條」無壓力。
IN開業本錢
投資日期：2001年9月
租金（約100呎連1個月按金） ?16,000
裝修 ?5,000
人工（1名） ?1,500
入貨 ?30,000
宿舍 ?2,000
雜項 ?250
流動資金 ?10,000
總投資金額 ?64,750
平均每月營業額 ?13,500
平均每月盈利 ?8,000
去年年中阿Cat便以?8,000租了這間小店舖，主要做男裝飾物，初期人流尚算唔錯，但由去年年尾開始，商場人流愈來愈少，生意額自然驟降，要虧本；呢個時候阿Cat就要求減租，終於以一半租金?4,000繼續經營，直至現在呢盤生意先有得做，才有盈利出現。
由於阿Cat熟識一些成衣廠家，所以對時尚女性衣着嘅貨源毫無問題；不過由於附近有不少售賣同類型服式嘅店舖，所以阿Cat為免貨種相同，轉而自己上網摷世界各地專售出口成衣嘅網址訂貨。由於款式夠特別，利潤又高，隨時可以有60%嘅純利收入。
「最多試過春節期間一日有?2,000營業額，而平日則以星期六、日最掂，而首飾將會成為夏天最熱賣貨品之一。」
衣着及打扮極之前衞嘅阿Cat，本身已經係一個做服飾嘅生招牌；由於阿Cat左右兩邊耳朵穿上共14隻耳環（左5隻、右9隻），自然對推廣時尚嘅銀器耳環有幫助。由於阿Cat日後打算替人作紋身服務，除咗𠵱家跟人努力學習紋身技巧外，自己右臂亦紋上「七彩蓮花」圖案，實行以身作則，方便日後做其紋身事業。
「好似嗰件美國Style嘅肚兜，由於十分性感，一般女性唔敢着，但由我親自着上身示範，就試過一日賣出幾件嘞！」
開舖StepByStep
1﹒選定心水舖位，與合適商場洽談合作事宜。
2﹒若條件合適，帶齊香港身分證、公司資料和上期按金便可簽合約。
3﹒申請稅務執照（包括國稅和地稅），可往深圳稅務處辦理，約一星期便可。
4﹒訂好租約日期，一般有1星期免租期，可搵人裝修。
5﹒裝修好便可擇日開張。
由於現時這個商場始終未夠人流，所以阿Cat話好有機會轉場再發展，「今年9月24日就租約期滿，到時就可以拎番?4,000按金。如果減租我可能會留低，但加租就會即走，但要到9月同商場傾嘅時候至知。」
假若要搬，阿Cat話最佳選擇仍會集中喺東門步行街或福田華強北路一帶，而最近拓展迅速嘅佳寧娜商場，亦會喺阿Cat選舖之列。至於貨種，除咗現時以前衞服飾為主，日後會嘗試轉型售賣HelloKitty貨品亦未定。