關刀今年重頭作：漢字馬年空軍鞋，果然一馬當先，反應爆棚，開賣半日即斷巿。
原來日本剛巧黃金假期，日本仔乘機過江，星期六、日參觀灣仔玩具展，狂掃米高、鐵仁公仔，緊接星期一去花園街掃行貨馬字鞋。返到日本套現，機票食宿袋袋平安，執埋執埋隨時變成第13個月糧（日本仔只出12個月糧）。
不過如果撞正買中假鞋就蝕咗喊唔番。波鞋街Sales訴苦Sam話：「馬年鞋行貨星期一未出街，星期四、五已經喺旺角有假貨。班假貨黨愈來愈猖狂，以前行貨賣斷先批假貨食尾水，𠵱家行貨未賣便搶先批假貨，重學人哋講咩搶灘，增加巿場佔有率，似是而非。假貨佬都講『孖屐亭』，問你死未？」
再係咁落去，關刀遲早發火做嘢。之前大圈幫利用假蛇皮空軍鞋搞亂國際拍賣網，美國仔紛紛中招，最後要由美國關刀出面平息。話晒人哋國際性大公司，你估我哋香港創作人咩？海關一定搞掂大公司問題先。
主持人：大食Jack
八卦熱報：