電腦J來電：「喂，聽日我去上海，要唔要買火腿？」買火腿就唔使嘞，點解去上海呀？趁高興乎？電腦J話：「開工啫，台灣客戶結束台灣工廠，炒剩十幾個主要幹部，全部去上海開廠，我上去重新裝配系統啫。」
到內地開廠，香港早已有之，工業已走得八八九九，𠵱家台灣人有樣學樣，台灣啲失業率好難唔繼續上升。雖然自己對製造業就業嘅「零和遊戲」（即港、台職位消失，大陸同類職位上升）已經麻木晒，但每逢聽到朋友講起，仍不免若有所思，諗吓自己嘅下一代要點樣調整，適應新形勢。曾蔭權、梁錦松、任志剛安慰香港人就容易，若身在調整過程（譬如電腦J個客戶啲台灣工人），唔焦慮就假。居安思危，為下一代憂，乃人之常情，無論自己嘅仔女點樣學好兩文三語，讀埋碩士學位（讀博士學位不可強求，夾硬嚟反為不美）；無論文、理、工、商，都唔可以保證佢哋可以搵番我哋二十年前嘅優差，而薪水以實質數字計算（扣除通脹效果之後），就可能返回二十年前嘅水平。總之，喺中國呢個「投資黑洞」未填滿之前，香港台灣嘅工資都會向下調，直至與中國平衡，或者要到我個孫嗰代，呢個調整過程先至會完結。
目前有乜好做呢？惟有見步行步，保持鬥志，時刻學習，千祈唔好放棄。