最近的大手投資物業成交有一個好特別之處，就是分層式單位成交不多，卻不斷有全幢物業易手個案，聽業內人士講，箇中原因是投資者購入連地皮物業，除作出租，重有重建機會。
長實紅磡海名軒成功造勢，成市場焦點，由於響中環中心同紅磡現樓都有示範單位，啲客好自然會兩邊睇晒，最方便當然係搭的士，咁代理個荷包就好傷嘞，但中原施老闆話會孭起夥計條的士數，相信中記代理會好積極做呢個盤，唔知啲的士大佬又識唔識響中環中心樓下兜批客呢？
利嘉閣地產第4屆精英會昨日誕生，選出7名會長連幹事（圖），會長由淺水灣的高級經理李本立當選。聽利記董事總經理何紹章講，過去兩個禮拜，利記展開大型招聘活動，已有200名新力軍加盟，為公司注入不少動力。
內地房地產活動愈嚟愈多，地點多喺深圳同廣州，不過，東莞都有搞房地產展覽會，由於該處係最多港人置業嘅內地城市，同時重有好多大型屋苑賣緊，所以響度搞展覽會都唔係冇道理嘅。
蘭西