恒指升啲，電訊股同個別地產股領風騷。聯通（762）禮拜一發表首季經營數據，前日升25仙，昨日再升10仙，收7.75元。
外國電訊股唔妥，反為國內電訊股吃香，啲錢掟落佢哋身上，理由係基金整頓投資組合，沽出冇業績嘅外國電訊股，買番有業績嘅電訊股，呢種行動大家都識，叫做換馬。
聯通Call輪，呢兩日未有跟貼正股，執番啲，冇蝕底。
10件Call輪，冇乜得揀，向最多成交者埋手可也，即係9094同9035，兩件都係11月到期，溢價4%左右，槓桿率4.1倍同4.6倍。論爆炸力（同殺傷力），當然比唔上其他電訊股Call輪，但喺同類輪中，數據已經算係最靚。
電盈熱門Call輪9111，前日升3.1仙，昨日跟正股（008）回落，跌番1仙。
中移動（941）同聯通有勢，電盈遲早追番上去，9111趁低買贏面大。
9111（8月到期）現價26.5仙，溢價6.6%，槓桿率7.5倍。正股睇2.20元，9111就算溢價縮細，都可見40仙，回報唔錯。
章 盛