四年一度的世界盃，將於5月31日正式開鑼，一眾Fans未鬥牙骹，先鬥忠心，瘋狂搶購各種世界盃紀念品。但世界盃產品五花八門，難免令人眼花撩亂。想收藏貨品物超所值，甚至升值，以下三位世界盃收藏專家，相信可以為你提供不少意見。
記者：朱文俊
攝影：陳智良
本身是goal4u.com足球網頁編輯的Kid，十歲開始便與足球結下不解緣，1986年的一場世界盃決賽，法國對巴西，到現在還令他津津樂道。「嗰次簡直令我對足球完全改觀，因為當時香港足球技術，可以用平平無奇來形容，但睇番兩隊表現，除咗神乎奇技，無嘢好講！打足全場唔過十個界外球，雖然最後巴西隊輸咗，令我唔開心成個月，但係就令到我更加想了解多點足球。」
由那時開始，他買了第一本足球雜誌，到現在他投資在足球精品的金錢，早已超越七十萬港元。講到用了這麼多錢去收集有關足球產品，Kid滿不在乎地說：「我花咗十幾年時間，用幾十萬去儲（足球產品），其他人就用啲錢晚晚落蘭桂坊，其實係各有所好，但起碼我𠵱家有七千幾本雜誌、幾百件波衫、過千張海報，計埋其他公仔『立立雜雜』咁，過萬樣收藏，我唔係香港儲足球嘢最專最多嗰個，但肯定係最雜一個。」
球迷奇遇獨家精品
講到收集精品心得，Kid認為除了有球員簽名外，古舊又停產的更是最珍貴。所以一直以來，他都朝住這個目標進發，有時為了得到一個球員的簽名，他可以跟住球隊，由香港到澳門，再跟到去美國，亦因為這份熱誠，不少球員都認得他。其中唯一一個在世界盃決賽中，射入三球、令英格蘭取得1966年世界盃冠軍的靴斯，來港時，更親自在酒店與他閒談，並送上他的親筆簽名相片。近年紅透半邊天的中國國家隊教練米路天奴域，更在機場邀他喝咖啡，並從自己身上取下一件墨西哥帽紀念飾物送給他，這一切的球迷奇遇，令他對足球更至死不渝，明知手上的精品價值數萬元，亦不捨得出賣。
Kid部分珍藏
對於有四十年集郵經驗，更經營一間集郵社的陳漢樑先生，對世界盃熱情同樣難捨難分。他專職收集體育郵票，對世界盃的資料瞭如指掌，而他的私人珍藏郵票，更是由第一屆世界足球賽（當時還未叫做世界盃），以至現在無不齊備。他認為儲郵票與儲世界盃精品一樣，最重要是專心：「好多初初學集郵的朋友，都會問我一個問題，就係全世界郵票種類咁多，而且每年重有九千幾款新郵票面世，好難去揀選，我的答案就係揀邊一種都無所謂，最緊要係揀定就唔好轉，否則前功盡廢。」
在眾多郵票收藏品中，有幾套是陳先生認為頗具收藏價值的。「一套世界盃史前郵票，亦係全世界第一套足球郵票，1924年由烏拉圭發行，紀念自己國家喺奧運足球比賽取得冠軍；當年這套郵票只係值一個幾毫，今日就算經濟不好，郵票炒價回落，一套首日封最少都要賣到$8,000，升值達八千倍。另外第一套正式世界盃紀念郵票，於1934年由意大利發行，面額約為港幣兩元，現時市價約$1,600，都算幾珍貴。除郵票外，『小全張』（整套由多枚郵票組成，連邊紙原封不動的郵票）或『樣張』（即製成郵票的初稿）都是集郵者的心頭好。以1978年摩納哥為世界盃推出一套『無齒小全張』便值$3,000；一枚1950年巴西世界盃『樣張』」便被炒至$1,200，升值不可謂不小。近年較為特別的世界盃郵票，應是1998年由主辦國法國發行的第一枚世界盃圓形郵票，𠵱家雖然未見有炒賣情況，不過長遠來講，應該有升值潛力。
具升值潛力世盃郵票
查詢：郵來郵去郵票社
電話：25669608
要儲世界盃產品，當然少不了要幫襯一眾精品店，開設世界盃產品專門店的Roy，於林林總總世界盃產品中，惟獨看好球星公仔的升值潛力。「其實道理好簡單，好多時世界盃打完，重有好多人去搵球星公仔，即係市場有需求，其次係公仔一日唔拆盒，佢價值只會升唔會跌，但係其他產品，好似波衫咁，就算你買返嚟唔着，擺得耐都會舊，再講其他產品話限量生產，係唔係無人知，但公仔大部分都有編號，無得呃。據我所知，喺歐洲，好多球星公仔，一推出市面，就已經係炒價，好似巴西李華度、葡萄牙費高公仔，拍賣價可以由原本幾十（英）鎊，去到幾百（英）鎊，回報相當唔錯。坦白講，一個鍾意睇波的人，點都會有一兩個心愛球星，尤其係賭波嘅，一買就成隊波買晒，真係好話唔好聽，擺喺度供奉吓都要啦！所以我認為儲球星公仔最保值。」
查詢：352大本營
電話：27707352
具升值潛力球星公仔