海產唔一定要游水魚至好味，急凍貨一啲都唔差，不過急凍魚扒嘅種類唔算太多，最常買到嘅有青衣、龍脷、銀鱈魚等，其實重有一種肉質同埋味道都唔錯，而且價錢又經濟，等大家多一個選擇，佢就係比目魚扒嘞，比目魚扒嘅來源地好多，香港買到嘅多嚟自日本同美國，兩者其實分別唔大，因為比目魚嘅肉質一向比較實淨。而比目魚扒喺急凍舖買會比超市分分鐘平六至十蚊一磅，大家可以留意。
天氣愈熱就愈要飲啲冰凍飲品，汽水只能解一時之渴，而且飲得多重會致肥，係女士嘅大忌，我之所以叫肥媽就係暴飲汽水之故。家吓我已改飲低卡路里而又健康嘅飲品，呢輪椰王當造我就飲佢，佢唔單止消暑解渴，且重好有益，燥熱飲佢更具有清熱功效，計我話比飲汽水更健康有益呢！
有時忙起上嚟，最好有啲方便食品幫吓手，好似呢款南順海鮮蝦球，就係我嘅好幫手之一，喺冰格攞出嚟，毋須解凍，炸佢四至五分鐘就搞掂，食時可蘸茄醬或沙律醬，啲小朋友好鍾意。若果怕太熱氣，亦可以用清水將佢烚熟，一樣咁爽口，皆因佢成分有蝦、魚、墨魚等，重加入咗蒜茸，所以分外惹味。