今年六十七歲嘅譚炳文（炳哥）因為心臟有事，早排同李香琴去新加坡郵輪登台，瞓瞓吓突然之間呼吸困難，好彩及時送去船上嘅醫療室搶救，暫時冇生命危險。
𠵱家炳哥住喺港島區醫院嘅心臟科，記者前日去探過炳哥，佢個女Anita照顧阿爸時好細心。Anita話畀記者知炳哥十幾日前做咗個大手術，將腳部嘅血管駁上去心臟，所以𠵱家唔郁得，要卧床休息。
而炳哥就同記者講話今次病一病瘦咗十幾磅，醫生話起碼要休息幾個月，而且佢今日重要做「內置心臟電擊去顫器」手術，做完要瞓一晚深切治療室，之後就可以出院。炳哥已經將下半年所接嘅騷全部推晒，佢話損失大概都有成八十幾萬喎。
王傑和李惠敏（Amanda）前晚分別在跑馬地出現，他們各自約了朋友往附近消遣。
Amanda前晚偕同女性友人到蓮園甜品消夜，她們點了燉蛋和紅豆糕，見到記者拍照時，Amanda即說：「影過啦，我成日都喺呢度出現。」結果Amanda和友人吃完甜品便離開，埋單約四十多元。
最近英皇歌手為擋煞，受高人指點都紛紛穿上藍色的衣物，可是王傑前晚去街卻未見身上有藍色的衣服，他全身都是綠色打扮。王傑到附近的櫃員機提款時說：「我一陣同你哋啲行家（即記者）飲嘢。」
採訪：何永寧 攝影：陳慧安
楊千嬅套《乾柴烈火》上星期五上畫，計埋星期六、日三日票房累積咗三百七十六萬，成績都唔錯，但係都唔夠西片《蠍子王傳奇──盜墓迷城外傳》揮，《蠍》片同《乾柴烈火》同日上畫，三日票房收四百三十一萬。《蠍》片食住《盜墓迷城》個勢，雖然唔係《盜》片男女主角孭飛，但觀眾依然受落。
傅珮嘉噚日去港台接受《娛樂滿天星》訪問，佢將會喺七月出書，佢話：「本書係我同一個DJ一齊寫，主要係環繞愛情同娛樂圈嘅事。」問佢會唔會喺書中踢爆好友張栢芝嘅秘密？傅珮嘉話：「我會寫吓藝人嘅內心嘢，係曾經發生過都會寫，栢芝我就未諗到寫乜，啱就會寫，亦都會請圈中朋友幫我寫序。」
葉璇早前接拍新劇《打更急先鋒》，套劇啱啱開工，葉璇就向無綫辭演呢個角色，𠵱家由力捧花旦之一嘅楊怡頂上。今次葉璇辭演，係因為之前拍攝重頭劇《雲海玉弓緣》時，因經常要吊威吔，令到佢條腰傷咗，到𠵱家都未好番，所以決定休息吓，醫好身體再算。
劉燁自演完《藍宇》一片後，外界好多人都以為佢係同志。劉燁日前出席香港電影金像獎，就帶咗女友謝娜同行。謝娜原來喺湖南電視台做嘢，係一個綜藝節目嘅主持，今次嚟香港，除咗陪男友外，重要為自己主持嘅節目做一個專題。