貴為東岸一哥嘅網隊終於打番場爭氣波，大炒溜馬十六分，爭番啲面子，其實，以我求大俠所知，係有段古。
網隊今次贏波真係要多得傳媒嘅激將法，因網隊喺季後賽頭炮衰咗畀掹車邊入季後賽嘅溜馬後，俾班北美行家鬧到狗血淋頭，尤其今季MVP大熱門嘅傑特更成為箭靶，俾人話領軍無方兼冇料做MVP云云；激到傑特同班網隊球員七竅生煙，發誓第二場定要出盡九牛二虎之力，打死都唔可以再衰畀人睇。
結果傑特喺第二場發威幾乎攞到三雙嘅成績，另外前鋒馬田更加自動請纓盯死首仗攞咗成三十分嘅謝美恩奧尼爾，令呢位新丁今云只有十二分；馬田喺贏波後意氣風發對班記者講咗一句西班牙話：「Manoamano。」意即「隻揪隻，以牙還牙」。
記得英格蘭喺上屆世盃搵咗著名時裝設計師PaulSmith做西裝，不知幾型；今屆就轉咗Burton，但設計就認真普通，白恤衫黑褸黑褲黑呔，款式似足星爺喺電影金像獎頒獎禮着嗰套。之不過星爺嗰晚就威到盡嘞，掃晒所有大獎成為大贏家，唔知英格蘭着咗呢套以黑色為主嘅老西又可唔可以威番次呢？
美國國家足球隊喺禮拜一已率先公布咗參加今屆世界盃決賽周嘅二十三人大軍名單，我求大俠一睇，真係以為自己眼花，因有成十人都年過三十，最經典就係三個龍門重係費度、基拿同埋美奧拿，真係唔知話美國隊冇進步，定係讚呢三個龍門寶刀未老好。
米路天奴域同中國足協不時向外發表言論立場好唔同，就好似米路日前同記者講准球員帶埋妻兒女友去世界盃，點知一眾球隊高層包括領隊朱和元、足協副主席張吉龍同新聞官董華第二日都話無咁嘅事，唔承認米路講嘅嘢，似乎又一次證實雙方合作欠缺溝通。