中貿林應邀到香港會食晏，咁啱得咁蹺，見到馬會副主席夏佳理與馬會總裁黃至剛在「紅房」（RedRoom）同枱吃飯，似有事密斟。中貿林腦海中於是浮現了《蘋果日報》上星期嘅獨家報道，指夏佳理會八月後出任馬會主席，整頓一番。中貿林事後打電話畀左丁山報料，講多一句：「唔通夏黃兩人咁快就坐埋傾下一季嘅會務？」
人哋講乜，大家都唔知，亦無謂打聽。以事論事，假若馬會主席一職懸空，夏佳理當然係董事會中最夠資格繼任嘅人選，佢資格老，精通法律，養馬賭馬幾十年，知道晒馬圈內外事務，個人又醒目精明，做馬會主席嘅話，深慶得人啦。
中貿林又聽到馬會收緊全費會費會員入會人數，每位由二○○二?○三年季度起（七月一日開始），每位遴選會員、名譽董事、名譽遴選委員，只可以推薦一位（現在係可以推薦兩位）人士做全費會員（fullmember），入會費亦由十二萬元提高至二十五萬元，可能會令一啲排緊隊入會嘅老友記三思而不行！獲遴選會員提名，已經需要好大交情人情，更加上一筆可觀入會費，唔係咁易負擔也。
其他啲會所入會費亦好貴，動輒三十萬元以上，但其他會所會籍有二手市場，必要時賣番出去唔使蝕本，而馬會會籍不可轉讓，其中嘅分別係好大㗎！不過做乜會物會會員純屬私人決定，人哋訂下入會規矩，你唔鍾意，大可唔入啫。