潮州人出名識搵錢又團結，噚日由香港二十幾個潮屬社團組成嘅「香港潮屬社團總會」，舉行第一屆會董就職禮，睇怕呢個都算係香港第一大社團。唔信？請看會長名單──榮譽會長：李嘉誠、莊世平；名譽會長：陳有慶、林百欣、廖烈文、饒宗頤、洪祥佩；主席：陳偉南。
超人主持升旗禮，不過噚晚成個就職禮由頭到尾，佢都同身邊嘅汕頭市市委書記李統書雞啄唔斷咬耳仔，重不時用力揮舞雙手。直到司儀大聲示意全體起立奏國歌，超人同李書記都傾到入晒神，人人起晒身佢兩個重坐喺度傾偈。好嘞，奏完國歌坐低，兩位李生仍然未傾完，於是趁住主席陳偉南致辭時又再傾過，唔知超人同李書記傾乜傾到咁High？
八方之後問李書記，李書記話冇傾到汕頭投資等公事。兩人係多年老友，只係傾私事，重識得話「我不可以有隱私權嗎？」不過兩位大粒佬在典禮台上、就職禮過程中當眾傾私事，會唔會有點兒……
﹙圖﹚超人噚晚在就職禮由頭到尾，都同身邊汕頭市市委書記李統書雞啄唔斷咬耳仔。
E-mail：