前晚睇見美股大插水，趙飛雲暗偷笑，讚自己眼光準，沽貨獲利時間啱啱好，重諗住噚日恒指會插深啲，可以喺更低位撈番恒指輪9045。點知恒指噚日真係跌至11100水平支持位已經跌唔落，跟住掉頭回升，稍為猶豫多一陣，恒指輪9045已經急上，結果要買貴貨，追到0.229元先至買得番，而且顧得頭嚟唔顧得腳，長實輪9063竟然冇買番，真係有啲進退失據。
今次偷雞唔到蝕把米，只怪自己功力未純，未能知行合一，其實好多事都好似炒股咁，「知之非難，處之則難」，有時真係一動不如一靜。
睇番噚日即月期指未平倉合約仍逾4萬張，如果噚晚美股大反彈，今日好友肯定挾多劑，3月頂部11381料可攻破，並有可能升近250日線阻力11540才出現較大調整。
佑威（627）上個禮拜撈底後，最高見過0.73元，但最近4個交易日每日跌1格，走勢偏軟，如果今日升唔番上0.70元或以上，都要先計數。
噚日有個老友介紹隻科達控股（673），話差不多收齊貨，正準備開車。如果閣下有冒險精神，不妨睇吓，但趙飛雲近排對藍籌輪興趣大過股仔。
趙飛雲