世事有冇咁蹺呀，嗰頭公司供緊股，呢頭股價又上升，然後公司就發聲明，話同第三者傾緊合作。
小初講緊係先思行（595），話說月頭佢先至公布2供1，每股26仙嘅價格供股，集資淨額2900萬元，股東通函今日至寄出。
本來先思行今次供股，係由大股東做包銷商，小初起初重以為大股東想趁低供股收貨，但睇股價表現又唔多似，皆因近排先思行股價係咁升，好似噚日咁，大升26.5%，收43仙。
由於近排賣殼活動多咗，所以有唔少人睇咗先思行嘅通告，重以為係暗示賣殼，所以撲落去買貨，其實公司講嘅係合作。不過現價43仙計，相信都有人願意以26仙供股。
另外，近排接二連三有多隻工業股冇厘頭獲外資大行品題而急升，噚日生產BB車嘅隆成（1225），亦升咗9.8%，收1.35元，盤路所見，某外資行密密力吸，似乎有料到。
慕容小初