時裝熱潮瞬息萬變，有人話今季興尖頭鞋，卻又殺出大量圓頭鞋，究竟邊款至興，小記都唔敢包，不過可以肯定嘅就係平底布鞋今季勢成大熱，無論尖頭定圓頭都一樣以布製為主，以下就為大家介紹各款至Hit款式，全部都係三百蚊內超筍貨，尖頭、圓頭各買一對都絕對負擔得起！
記者：許穗齡 攝影：楊錦文
Model：BiBifromStarzpeople
本本時裝雜誌都話芭蕾舞鞋會勁Hit，小記覺得就算興都未必會長久，不如平平哋買對跟吓潮流算數。呢款由本地製嘅芭蕾舞鞋，以粉紅色及白色橫間布製成，款式簡單，配埋粉紅色絲帶，襯番條白裙仔就最啱，重有藍白間條同黑白間條的款式供大家訂購，雖然需時約一星期，不過唔使$200蚊就有一對，小記覺得勁抵買。
要數惹人注目，必屬呢對鞋頭有朵大紅花的圓頭鞋。圓頭貼腳設計的布鞋，以紅白橫間布製成，最搶眼當然是鞋頭上的紅色皮製花花，加埋布帶扣，頓時為鞋添上一分嬌美。
喜歡粉紅色系列的話，小記誠意推介呢對圓頭布鞋。呢對鞋需訂購，時間約需一星期，圓頭鞋以粉紅色布製，以深紅色線車製而成，車工尚算不俗，再配埋鞋頭的深紅色皮繩，斯文得嚟又唔會太呆板，啱晒活潑可愛嘅少女們。
雖說春夏季服飾多以淺色為主，不過如果你始終愛着深色鞋的話，$300以下一樣有得揀。呢款布鞋以黑色為底色，再印上不同顏色及大小的圓形圖案，款式都幾搶眼，而鞋身剪裁非常貼腳，唔會着到好似大腳八咁，襯裙襯牛仔褲一樣咁好睇。
又到半截裙出籠嘅時候，當然唔少得買番對靚鞋襯一襯，呢對以車喱子為主題嘅拖鞋就最適合不過。鞋面以印滿紅色車喱子圖案的白布製成，加上鞋頭的一對以棉線製的立體車喱子，着上腳非常Cutie，屬今個春夏少女的BestBuy。
如果你同小記一樣怕麻煩唔鍾意縛帶鞋，不妨考慮呢款橡筋布鞋。鞋款設計非常簡單，不過最令人欣賞嘅係鞋的橡筋，跟番布款的同一色系，簡單中見心思。布鞋有鮮紅色、桃紅色、寶藍色、杏色及白色，選擇夠晒多。呢款鞋需要訂購，需時約一星期。
藍色加白色會令人聯想起海洋或水手，感覺清新怡人，呢對以藍白間條布製成的尖頭鞋就夠晒Fresh，設計同樣以簡約為主，加埋鞋頭的白色小蝴蝶結作點綴，分外可愛，現在只售$159，平平哋買對着一季都抵。
OL想買對Casual嘅尖頭布鞋一樣有合適嘅選擇，好似呢款杏色布鞋，款式就比較成熟大方，鞋身以淺杏色布為主，配襯淺啡色皮鞋頭及邊位，再加上一個簡單的蝴蝶結，返工或平日去街着都無問題。
PIXIE（23675598?23167367）
尖沙嘴UpdateMall1B及55號舖
StreetCulture（23680610）
尖沙嘴UpdateMall2號舖
MabelleDiapiro（25768400）
銅鑼灣金百利217號舖