化妝師大約分兩類。第一類係先定好全盤計劃，心中有晒規矩，每個步驟都唔會漏；第二種就較天馬行空，隨意得來近似畫家。而鄭秀文、王菲及陳慧琳都愛用的星級化妝師阿Zing，應是後者。佢唔會話單眼皮必要畫眼線，圓面必定打陰影等理論；佢只會同你講，化妝係要配合個人形格及個性，點化點加係因人而異。答案有如去睇相，見到你先話到畀你聽要點樣，所以結論係絕無貼士，要靠經驗與創意。而雖然阿Zing創作過靚妝無數，不過佢話，一世都唔會有最滿意、完美的作品。
記者：梁珮瑜 攝影：陳偉強
最近行街或睇電視，都會見到阿Zing的新作，為MaxFactor創作的青光眼──彩綠眼影新妝。「今季靈感來自酸味味的生果，好似青蘋果、橙同青檸等，全部都好有夏日的感覺。」講到今季流行化妝顏色，阿Zing就話除了青綠，自己本身亦鍾愛紫色，「紫色畀人一種成熟同Glamourous的感覺，但配襯上Pink的唇膏，感覺就會好Girlish好靚。」
與眾星合作無間，無數作品得到讚譽，其實阿Zing自己又最鍾意同至滿意那一個創作。「唔……有些妝我會覺得OK幾好，但無一個我係話滿意。如果有一個妝覺得好滿意，我就唔會有進步。我諗我一世都唔會有一個認為係最好的妝。」唔易滿足就是不斷進步的原因，其實阿Zing只係要求一次比一次好啫。為MaxFactor設計妝容多年，他令筆者印象最深刻的一次，要說是98年的四格化妝，絕對有創意兼有新鮮感。而問到最想合作的Artist，阿Zing話最遺憾的就是未能與林青霞合作，「佢係大美人，一代美女，好可惜無機會合作。」
雖然青及黃等奪目可愛色調成為今季大熱，但一向喜愛自然要簡單，阿Zing亦有好介紹。「Camel色是四季必備的Basic顏色，更是自然化妝不可少的。淡啡色眼影加淺色胭脂，感覺好自然，平時出街都唔錯。」
「今季MaxFactor的新色眼影適合所有女性用，要淡妝可搽薄一點，如想較Sharp又可加厚令顏色實一點，而且質地亦好易Buildup上色。另外不脫色唇膏更是一個Bonus，好啱懶補唇的人。」
化妝最怕狀態唔好唔上妝，遇到水腫或皮膚乾燥問題，阿Zing又有甚麼急救方法？「水腫就真係無辦法，惟有係等。如果皮膚乾燥同狀態唔好，我會幫佢哋敷SK-II的水分Mask，保證好快見效皮膚靚番，好有用。」
而問到阿Zing自己會唔會護膚，佢就話男士護膚好應該，等於去健身一樣，令自己外表更好是對人一種禮貌。「我自己比較懶，屋企好多產品但都好少用，多數只會敷SK-II的面膜。」
除了化妝護膚，覺得阿Zing對於時裝潮流都有心得，事關見佢每次打扮都好In。「我着衫五時花六時變，鍾意多選擇，所以會買不同的牌子，無話特別鍾意或者必買某個牌子，最主要都係睇場合同心情。」而佢最常幫襯的就是D-Mop，另外都會到Joyce及日本、巴黎等地入貨。
MaxFactor（28342166）
銅鑼灣崇光百貨地下化妝專櫃
SK-II（查詢：25829849）