美股下挫，港股竟然掉頭上升，中國移動（941）與中國聯通（762）噚日大幅上升逾3％，成為升市火車頭。
黑客話，噚日有淡友平中移動及聯通空倉，亦有基金補貨增持，所以將港股挾高逾200點。
外國電訊股唔掂，資金搵中國電訊股作為避難所。加上最近美林調高港股投資比重，資金近日開始流入，港股後市仍係大漲小回局面。
高寶綠色（274）將公布新投資計劃，股價近期經過一輪調整後，噚日掉頭回升2.9％，報1.76元，成交達1261萬元。Cookie話此股有料到，短期可跟炒一轉。
信德（242）噚日除供股權，股價冇咩變動，但下午宣布去年賺2.763億元，增長11.8％，就比市場預期為佳。出售華民航空賺1.78億元，應該今年入帳，相信對股價有刺激作用。
益安（082）升勢持續，再升13％，收報0.96元，成交開始增加。
不過，ｉ師傅話差唔多應該收手，特別係升穿１元之後。至於點解，佢話唔好問。
最近和記港陸（715）勢強，噚日又升8.2％，收0.66元，成交達9311萬元。
ｅ莉莎報料話，有大戶收緊貨。據聞管理層傾緊點樣搞注資及業務轉型，吸引到一班自以為係春江鴨之輩追捧，不過有冇料到重未知，暫時炒住先，短期目標價0.70元。
阿 虎