人氣偶像Twins將於馬偉豪執導的新片《這個夏天有異性》中首度打孖上陣，而在電影中的談情對手，則是組合Shine的成員徐天佑及另一樂壇新人、周啟生的姪仔周永恒，但他們的身價跟女主角相差甚遠，就算他們跟Twins的談情戲，亦被下令「冇得咀」。
由馬偉豪執導的愛情片《這個夏天有異性》本月底即將開拍，雖然男主角早前定了是王傑，但據悉為了不想變成「忘年戀」，電影公司特別安排Shine成員徐天佑與Twins的蔡卓妍在片中相戀，鍾欣桐與周永恒則演另一對戀人，而Shine另一成員黃又南則客串一角。
兩位男孩雖可以跟當時得令的Twins談情，但縱使蔡卓妍的螢幕初吻已獻給陳奕迅，據悉Twins所屬的公司英皇仍向電影公司落令，在戲中不得有接吻鏡頭，只可以拖手仔。
至於薪酬方面，首次打孖上陣拍片的Twins合共有一百二十萬，不過她們的拖友徐天佑及周永恒據悉分別約有二十萬左右。
昨日記者致電馬偉豪，對於傳聞英皇不准兩位男主角徐天佑及周永恒跟Twins拍接吻戲，對此馬偉豪笑說：「拍《百分百感覺II》嗰陣，容祖兒同陳奕迅夠話唔咀，我相信Mani（Twins經理人霍紋希）只係講笑啫，邊有限制。」
昨日在尖沙嘴出席《明愛暖萬心》活動的Twins，表示將跟王傑在《這》片中合作，而其經理人霍紋希在電話中亦說：「我尊重導演選擇，不過唔會畀Twins喺《這》片入面有咀戲。」
此外，Shine前晚在尖沙嘴一的士高出席活動，兩人異口同聲說要增肥，其中黃又南表示食朱古力食到嘔都未能增到半磅。
而徐天佑說因在健身院遇上同志騷擾，故惟有放棄健身增肥。他說：「有次我撞到蔡一傑，佢畀個四十磅啞鈴我練，但我舉唔起，之後佢介紹我食奶粉增肥，不過太貴買唔起。」
採訪：盧雪琪、李珮洳、駱華齡
攝影：陳烱威