近期，大型城市Feel嘅SUV，響北美及歐洲市場可謂方興未艾，而日產車廠響剛過去嘅紐約車展上，正式宣布會響稍後時間，推出全新Murano優閒四驅車系。
自從日產年前有X-Trail正式登場後，中型SUV響市場總算站穩陣腳，唯一欠缺就只有如Murano咁大型嘅城市SUV車系；相信日後Murano嘅面世，除對同屬日本嘅豐田Harrier（即港版凌志RX300），以及三菱Pajero構成威脅外，亦有意挑戰平治M-Class同寶馬X5系列。至於呢款造型咁有野性及剛勁美嘅Murano，除配備3.0公升V6偈（馬力220匹）外，重有頂級版跟Skyline相若嘅3.5公升V6偈（馬力240匹）組合，加埋恒式四驅裝置，以及一套7前速CVT半自動波箱㖭；睇嚟Murano嘅誕生，確實會刺激起SUV市場一番龍爭虎鬥噃！