海南島呢個月頭係威係勢主辦咗一個《博鰲亞洲論壇二○○二》嘅大型會議。《蘋果》當然冇份，不過，有單漏網新聞幾過癮，至少可以令香港人拾回些少信心，唔使日日驚被人超越。
有與會者最近向八方傾訴，話個會請咗咁多猛人嚟，包括日本首相小泉純一郎、泰國總理他信、南韓總理李漢東，以及一班政界前名人及商界要人，重有總理朱鎔基親自壓陣，點知安排同設施就好唔掂。
酒店房唔夠，搞到有人要住咗去海口，距離會場鬼咁遠；重有大會論盡到連badge都做唔齊，最慘係嘢唔夠食。最後要朱總理喺晚宴上企出嚟，用成十五分鐘就一切安排向一眾來賓道歉，重話保證明年會有所改善，你話幾咁尷尬，肯定有人要孭鑊。
所以話，香港重未完蛋，皆因我哋辦嘅會議一定冇咁差，如果唔係，ITU國際電訊聯盟的成員點會一致要求今年應再喺香港開年會、搞展覽？梗係我哋好正，有生意做兼好食好住啦。
E-mail：