布雷西亞前鋒巴治奧響禮拜日奇迹復出兼梅開二度，能人所不能，令人拍案叫絕，而最令我求大俠點頭稱善嘅係呢位老人家有一份甘願犧牲小我，完成大我嘅情操。
係人都知「小馬尾」重未放棄參加世界盃，佢對費倫天拿𡁻入兩粒後承認心知時間無多亦會盡力而為。不過，佢更強調就算意大利教頭查柏東尼最後真係唔選佢呢類老柴，都唔會埋怨對方；因為大家都係為國家隊大局着想咁話喎。響乜都講個「爭」字嘅球壇，巴治奧就恍如一股清流。
話時話，巴治奧能響重創後七十七日復出，相信同佢篤信佛理，心境平和有關。我求大俠響度唔係向大家宣揚佛理，只奉勸大家就算響逆境下都應該保持豁達心境，燒炭，諗都唔好諗呀！
相信唔少碧咸球迷睇到前日華倫西亞對拉科魯尼亞嘅西甲聯，一定心都涼埋。因為當日踢斷碧咸跖骨嘅拉科中場德舒拿，唔單止擺烏龍累球隊輸波，重連爭標機會都冇埋。不過話時話，德舒拿對住華倫嘅阿根廷同胞一樣踢得咁兇狠，睇嚟佢當日都唔係有心踢碧咸噃。
有英國報紙吹水話富咸會飛起領隊泰簡拿，搵荷蘭名宿古列治領軍。雖然富咸立即否認，重話班主阿法耶茲好嬲；不過我求大俠覺得泰簡拿教波真係唔多掂，佢花咗阿法耶茲唔少錢，但富咸僅護級成功，踢法又悶又冇form，應該係時候改變一下，踢吓古列治嘅「性感足球」可能重好。
湖人嘅奧尼爾「大嚿」就係人都知，但佢身手不嬲都有番咁上下靈活；勢估唔到噚日朝對拓荒者，佢俾人犯完規後失咗平衡，重要俾觀眾「Kick」親撻到四腳朝天；最慘就係電視即刻重播番拜恩之前救完波，瀟灑咁跳過觀眾安然着地嘅片段，今勻奧尼爾重唔瘀死！
有傳媒爆料話喺六月號嘅美國版成人雜誌《閣樓》會刊登業餘偷拍者拍得古妮高娃全裸嘅豔照，聽聞偷拍嘅質素唔錯㖭，呢個消息如果係真，簡直係各男士嘅「福音」啦，唔好話我求大俠唔醒大家，記緊要吼實幾時出書，先睹為快吖嘛！