長實紅磡摩天豪宅海名軒，吸引唔少城中名人購買，加上又話有內地富豪專程來港睇樓，頓成熱賣。佢哋上環嘅普頓臺就食住上，今日公布外形設計同環保概念等特色。
置業國際今日公布首季內地樓市回顧同上半年展望，重有最新港人內地置業調查報告。另外，蘭西啱啱至講話近嚟內地房地產活動多，就收到料話，深圳下個拜三舉行2002年房地產交易會，當日重有個論壇，主持戴德梁行話，內容係討論深圳房地產嘅機遇同展望。𠵱家咁多港人去深圳買樓，啲港商又響當地購地起樓，呢個活動都幾值得留意。
新世界屬下富城77名護衞員，響「東區傑出保安員獎勵計劃」中獲選為「傑出保安員」，佢哋負責嘅屋苑為鯉景灣、海峰園、東駿苑等。
寫字樓租金繼續下跌，西環一座新落成商廈，聽講呎租3.5元已經有交易，業主重送天花、地氈同提供獨立冷氣，不過，管理費要成兩個半一呎，抵唔抵，就要睇吓個客點諗。
蘭西