黎瑞恩前晚喺紅館舉行咗最後一場告別演唱會，佢重喊咗七次咁多，而許志安（安仔）同埋張學友更擔任表演嘉賓。
安仔喺台上大爆黎瑞恩嘅情史，重要求同黎瑞恩合唱《芳華絕代》，因佢想好似張國榮（哥哥）將個頭挨落阿梅個心口度咁，伏喺黎瑞恩心口，佢真係唔驚黎瑞恩男友曾智明呷醋。
曾智明都有出席慶功宴，不過曾生一被問到有關結婚嘅問題，佢就即刻封嘴唔答。另外，曾智明重叫記者以後唔好再益黎瑞恩上咁多娛樂版，但係搵佢買保險就多多都唔拘。
嘉賓之一嘅黃凱芹話當年退出樂壇，主要係同公司有紛爭，所以離開，因為佢覺得咁做起碼可以有番啲自尊。
二十三歲嘅韓國靚女歌手J，喺六月六日會嚟香港出席香港電台搞嘅「第十三屆國際流行音樂大賞」。
J喺呢個頒獎禮上除咗會做嘉賓，重有份角逐「最佳女歌手」獎。出過四隻碟嘅J，啱啱先喺韓國宣布暫別樂壇，但佢知道自己有機會攞獎，都好興奮話想嚟香港睇下，順便幫自己國家宣傳韓日世界盃。
已經兩年冇拍劇嘅李司棋，噚日現身無綫電視城，司棋姐話今次純粹係拍廣告特輯，佢話：「我自己身體唔係咁好，無綫拍劇嘅進度咁快，冇理由要人哋就晒我㗎。」但司棋姐透露遲啲可能會去新加坡拍劇集，佢話對方好有誠意，應承會遷就自己，所以接拍嘅成數都幾高。
賈思樂（Louis）噚日去港台接受《娛樂滿天星》訪問，Louis話邀請到呂方做佢音樂會嘉賓，不過呂方話一定唔唱英文歌，要唱自己嘅歌。而Louis更不停回味當年着喇叭褲同鬆糕鞋嘅日子，Louis話曾經邀請過露雲娜出席自己個音樂會，但係對方婉拒咗。
甘國亮噚日喺中環中心，參與由PretAManger贊助嘅「燃點星火慈善好時光」籌款活動。
甘國亮話一早估到周星馳（星爺）會攞到金像獎最佳男主角，佢重話星爺曾經話過會搵佢合作，不過佢自嘲自己咁老，淨係適宜做茶客嘅角色。
早幾日陳曼娜買咗黃埔灣畔嘅全海景豪宅海名軒，有傳佢用千六萬買嗰層豪宅，但陳曼娜噚日同馮仁昭講，話嗰層樓應該係二千萬，由於唔少買家見到報道話層樓比市價平咗好多，以為發展商畀咗唔少折頭佢，所以陳曼娜急於同馮仁昭澄清，佢今次買樓完全冇特別優惠㗎。