中唔到三T，繼續生活如常，係香港人嘅風格，今次唔中，或者下次家山發，輪到我呢。左丁山成班老友都係興趣廣泛之人，講馬、講波、講財經股票、中國大勢、反恐戰爭、情緒心理都可以講，上星期去馬場之前，碰到公子C，居然講到文化藝術。
公子C家族係老牌商人，公子C自細就養成藝術細胞，每年都到歐洲聽歌劇、音樂會，參觀博物館。上星期佢去參加「文化委員會」舉辦嘅「文化藝術資助政策」研討會，聽啲英國專家點樣講英國資助文化藝術，以及如何為文化藝術融資，聽到津津有味。
左丁山問佢有乜好橋，公子C騎騎笑：「可以叫松司長效法匈牙利，我聽到匈牙利諗到一個絕招，就係向色情電影、色情影帶（三級、四級）以及暴力電影徵收較重嘅娛樂稅，稅率比一般娛樂稅高，稅款用嚟做乜呢，就係用來資助匈牙利嘅古典傳統文化藝術音樂。原因就係三四級電影有市場，傳統文化藝術要向政府伸手，政府就諗到呢招『劫富濟貧』或是『圍魏救趙』，好橋呀！」
匈牙利人幾開明喎，可惜特區政府連賭波合法化都驚，點會夠膽將四仔合法化，再徵重稅呀？既然唔敢開徵呢啲咁有創意嘅稅種，政府惟有繼續諗辦法嚟資助文化藝術。文委會喺五月中又搞多一次同類研討會，請法國專家講法國如何資助文化藝術，公子C話佢一定再去聽喎。