鱘龍魚是國家瑰寶，以往鮮有機會可以品嘗這水中活化石的滋味，但自從人工培殖的鱘龍面世之後，鱘龍魚的美味便開始深入各階層。現今更有餐廳將鱘龍菜式放於自助餐餐牌中，與自古矜貴的鮑魚一同成為任食自助美食。正在忙於拍攝電影《恐怖熱線2熱血青年》的周麗淇Niki，趁空檔應記者之邀來為這頓鱘龍自助餐試味，品評一下優劣，看看這位美女的意見，能否給大家一點啟示。
記者：莫麗嫦
攝影：陳穎
雖然鱘龍生活於寒帶地區，但這種古老魚類不似三文魚般有厚厚的脂肪保溫，魚皮亦薄，炸後的鱘龍魚皮十分鬆化，兼且脂肪較少免去油膩感。炸鱘龍魚皮不用太多調味，師傅只會灑上適量淮鹽即可。
Niki試味報告：魚皮非常鬆脆，用來浸湯或湯粉會重好食。
鱘龍魚嘅魚腩無骨，但肉質較實，若處理不好容易變嚡。師傅以魚腩蘸上薄粉，放入油鑊內輕輕炸香，炸時只要剛剛熟即撈起，再以柱侯醬燜至入味。聽落容易，不過無師傅咁上下經驗，都好難做到出色鱘龍菜。
Niki試味報告：魚腩部分較其他魚大件，外層稍加炸香後異常鬆脆香口，魚肉亦見滑溜。
燉鱘龍頭（每位一客）
有水中活化石之稱的鱘龍全身都可以食用，身上的軟骨更是熬湯的好材料。鱘龍魚骨的鈣質特別高，原來白色的魚骨熬製後會變作透明，十分有𡁻頭。加埋沙參玉竹這些清潤藥材，心火盛的你記得連湯料都食埋。
Niki試味報告：十分喜歡飲滋補湯水，第一次試鱘龍骨熬的湯，非常鮮甜而且飲後有清潤感覺，不過都係媽咪煲嘅愛心湯水更好味啲！
鮑魚同牛仔骨，聽落是兩種風馬牛不相及的材料，不過現今社會凡事都有可能。牛仔骨同黑椒汁向來都是天作之合，鮑片今次卻介入其中，一齊由生焗熟，在錫紙內打得火熱，只要一打開錫紙便可感受當中的熱情澎湃。
Niki試味報告：自小聽媽咪話不吃牛，只覺得鮑片放在黑椒汁內焗後味道相當濃郁，卻蓋了鮑魚本身的鮮味。
菜式的好壞經常取決於色、香、味三方面。鮑魚本身香味不重，師傅便想出以鮮北菇補充；顏色方面用較蝦膠還白的墨魚膠配香菇的沉黑，黑白立見分明；爽口的鮑魚配彈牙的鮮打墨魚膠，口感更勝一籌。
Niki試味報告：三層材料，三種口感，特別兼具創意，最喜歡此菜清淡得來卻滲有陣陣鮮菇香，很滋味。
脆漿之內究竟係乜東東？很多人在疑惑之間將脆漿夾開，再將內裏的材料翻來覆去弄個明白方才放入口。不過，記者建議各位必須毫不猶豫地將佢送入口中，才可以將香甜的芒果、爽口的鮑魚及香脆的外層一次過品嘗。而且師傅每次都會用不同的生果，芒果和香蕉之外，還會嘗試用牛油果，總之咬開之後就自有分曉。
Niki試味報告：估唔到芒果同鮑魚味道可以咁夾，雖然是油炸食物，但有芒果在內不會覺得太油膩，很容易被人接受。
每位客人都可獲贈紅燒獅子頭鮑魚一客，賣相的骰的獅子頭不會令人未食先滯，摻雜肥瘦豬肉做成的肉球不油不膩，配搭來自太平洋的尖身鮑魚，一人一份都應付有餘。
Niki試味報告：獅子頭非常入味，味道與芡汁好啱Key；鮑魚細細隻容易食，只係入口有少許韌。
Niki試過這裏的食物都大讚好味，重攞埋訂座電話，要帶媽咪一齊嚟試！
李師傅入行二十多年，由海南至哈爾濱縱橫中國各地烹調粵菜，對各處地方菜都有認識。
店名：悅來軒
電話：26202312
地址：九龍灣展貿徑1號國際展貿中心3樓
營業時間：星期一至五上午11時半至下午3時半，星期六及日延至4時；星期一至日晚上6時至11時。
座位：約900個
付款方法：現金或信用卡（Visa,Master,AE,Diners,JCB）
自助餐供應時間：星期一至日晚上6時半至9時半
價錢：成人每位$168，12歲以下或長者每位$128。
備註：凡惠顧自助餐均可獲兩小時免費泊車優惠